एमालेले भन्यो– कांग्रेसको दिशाहीन नीतिको अलमल चिर्न नेकपासँग मिल्नुपर्‍यो

काठमाडौं । नेकपा एमालेले कांग्रेसले सिद्धान्तको नाममा अपनाएको अलमल र दिशाहीन नीतिका कारण उत्पन्न राजनीतिक अन्योल अन्त्य गर्न नेकपासँग मिल्नुपरेको जिकिर गरेको छ ।

एमाले प्रचार विभाग प्रमुख निरज आचार्यले  देशमा राजनीतिक स्थिरता, सुशासन, समृद्धि र प्रादेशिक विकासको गतिलाई तीव्र तुल्याउने जनताको तीव्र चाहनालाई सम्बोधन गर्न एमाले र नेकपाबीच नयाँ राजनीतिक सहकार्यको सहमति भएको बताए।

Watch On

‘आज देश एउटा असाधारण र चुनौतीपूर्ण राजनीतिक मोडबाट गुज्रिइरहेको छ । सरकारको बढ्दो स्वेच्छाचारी, निरङ्कुश र प्रतिशोधपूर्ण रवैयाका कारण जनतामा निराशा र भयको वातावरण सिर्जना भएको छ। यस्तो सङ्कटपूर्ण घडीमा राजनीतिक दलहरूका लागि परम्परागत सत्तापक्ष वा प्रतिपक्षको सीमाभन्दा माथि उठेर संविधान, लोकतन्त्र र देशको बृहत्तर हितका लागि एकजुट हुनु अपरिहार्य आवश्यकता बनेको छ,’ उनले भने ।

देश र जनताको मुद्दा नै दुई पार्टीको पहिलो प्राथमिकता भएको उनको भनाइ छ ।

‘संकटको यो घडीलाई नजरअन्दाज गरी सिद्धान्तको नयाँ जामा खोज्ने दोहोरो मापदण्ड अपनाउनु कुनै पनि जिम्मेवार दलका लागि सुहाउने विषय होइन । विशेष गरी नेपाली कांग्रेसले सिद्धान्तको नाममा अपनाएको अलमल र दिशाहीन नीतिका कारण उत्पन्न राजनीतिक अन्योल अन्त्य गर्नुपर्ने अवस्था आयो,’ उनले भने ।

यसै सहमतिका आधारमा प्रदेश सरकारहरूको पुनर्गठन गर्दै सुशासन र विकासको नयाँ यात्रा प्रारम्भ गर्न एमाले–नेकपा प्रतिबद्ध रहेको उनले बताए ।

‘हाम्रो यो कदम केवल सरकार गठनमा मात्र सीमित नभइ लोकतान्त्रिक मूल्य–मान्यताको रक्षा र जनतामा आशा जगाउने साझा सङ्कल्प हो,’ उनले भने ।