पक्राउ परेका सबै पत्रकार रिहाः सञ्चारमन्त्री डा. विक्रम तिमिल्सिना

काठमडौँ । सूचना तथा सञ्चारमन्त्री डा. विक्रम तिमिल्सिनाले आज पक्राउ परेका सबै पत्रकार रिहा भएको बताएका छन् । शुक्रबार साँझ फेसबुकमार्फत मन्त्री तिमिल्सिनाले सबै पत्रकार रिहा भएको जानकारी दिएका हुन् ।

Watch On

उनले भने, ‘‘पक्राउ परेका सबै पत्रकारहरू रिहा भएका छन् । सरकार प्रेस स्वतन्त्रताप्रति पूर्ण प्रतिबद्ध छ । प्रेस स्वतन्त्रता र जिम्मेवार पत्रकारिता लोकतन्त्रका आधारस्तम्भ हुन् ।’

शुक्रबार समाचारबारे बुझ्नु छ भन्दै प्रहरीले पत्रकारमाथि धरपकड सुरू गरेको हो । शुक्रबार दिउँसो प्रहरीले नेपाल प्रेसका पत्रकार विश्वमणि सुवेदीलाई पक्राउ गरेको थियो । उनलाई साइबर ब्यूरो लगिएको थियो । 

नेपाल प्रेसका प्रधानसम्पादक मात्रिका पौडेल र अध्यक्ष विन्दुराज लम्साललाई पनि साइबर ब्यूरो बोलाइएपछि उनीहरू त्यहाँ पुगेका थिए । 

नयाँ पत्रिका दैनिकको कार्यालयमा पनि सादा पोसाकका प्रहरी पुगेका थिए । उनीहरूले पत्रकार नवराज मैनालीलाई खोजि गरेका थिए । केहीबेरको विवादपछि प्रहरी निस्केपनि प्रहरी नयाँ पत्रिकाको कार्यालयमा घेरा हालेर बसेको थियो । दैनिकका २ पत्रकारलाई साइबर ब्यूरो उपस्थित हुन भन्दै प्रहरी त्यहाँबाट निस्किएको छ । 

यस्तै दियो पोष्टको कार्यालयमा पनि प्रहरी पुगेको थियो । नामनगरस्थित कार्यालयमा पुगेका प्रधानसम्पादक सुदीप विश्वकर्मा, सम्पादक रीता बुढाथोकीलाई खोजेको थियो। 

डिएनए खबरका धिरज बस्नेत पनि पक्राउ परेका त्यहाँका पत्रकारहरूले बताएका छन्।