रास्वपा सांसद पौडेलमाथि गरिएको दुर्व्यवहारको गगन थापाले गरे विरोध

काठमाडौँ । नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टीका सांसद गणेश पौडेलमाथि गरिएको दुर्व्यवहारको विरोध गरेका छन् । 

रौतहट निर्वाचन क्षेत्र नं. ४ बाट निर्वाचित प्रतिनिधिसभा सदस्य पौडेलमाथि साउन ७ मा जनतासँगको भेटघाट कार्यक्रम सम्पन्न गरी फर्कने क्रममा कालो मसी प्रहार तथा दुर्व्यवहार गरिएको थियो । 

Watch On

सभापति थापाले यो घटनाको विरोध गर्दै लोकतन्त्रमा कुनै पनि व्यक्तिमाथि कालो मसी प्रहार तथा दुर्व्यवहार गर्नेजस्तो अराजक गतिविधि स्वीकार्य नहुने उल्लेख गरेका छन् । 

'लोकतन्त्रमा विचार फरक हुन सक्छ, असहमति पनि हुन सक्छ । तर कुनै पनि व्यक्तिमाथि कालो मसी प्रहार गर्ने, दुर्व्यवहार गर्ने वा अराजक गतिविधिमा उत्रिने कार्य कुनै पनि हालतमा स्वीकार्य हुन सक्दैन,' उनले भनेका छन्, 'प्रतिनिधिसभा सदस्य गणेश पौडेलमाथि भएको आक्रमण निन्दनीय छ । असहमति भए त्यसको उत्तर संवाद, बहस र लोकतान्त्रिक प्रक्रियाबाट दिनुपर्छ, हिंसा वा अपमानबाट होइन ।'

यो घटनाप्रति रास्वपा संसदीय दलले पनि गम्भीर ध्यानाकर्षण जनाउँदै यस प्रकारको हिंसात्मक तथा अमर्यादित गतिविधिको घोर भर्त्सना गरेको छ । 

'लोकतान्त्रिक व्यवस्थामा असहमति र विरोध व्यक्त गर्ने अधिकार सुरक्षित छ। तथापि जनप्रतिनिधिमाथि हुने हिंसा, दुर्व्यवहार वा अपमानजनक व्यवहार कुनै पनि लोकतान्त्रिक समाजमा स्वीकार्य हुन सक्दैन। यस्ता गतिविधिले विधिको शासन, लोकतान्त्रिक संस्कार र शान्तिपूर्ण-सुसंस्कृत राजनीतिक अभ्यासमाथि प्रहार गर्दछ,' रास्वपा संसदीय दलका मुख्य सचेतक कविन्द्र बुर्लाकोटीले भनेका छन् । 

यस घटनाको निष्पक्ष अनुसन्धान गरी घटनामा संलग्न व्यक्तिहरूमाथि कानूनबमोजिम कडा कारवाही गर्न, घटनाको सत्यतथ्य सार्वजनिक गर्न तथा भविष्यमा यस्ता घटना दोहोरिन नदिने गरी जनप्रतिनिधिहरूको सुरक्षा सुनिश्चित गर्न रास्वपाले सरकारसँग माग गरेको छ । 

रास्वपा लोकतान्त्रिक मूल्य, विधिको शासन, अहिंसात्मक राजनीतिक अभ्यास र सभ्य समाज निर्माणप्रति सदैव प्रतिबद्ध रहने बुर्लाकोटीले स्पष्ट पारेका छन् ।