प्रधानमन्त्री बालेन र सभामुख अर्यालबीच एक घण्टा वार्तामा के भयो छलफल ?

काठमाडौँ । दुई साता लामो विश्रामपछि प्रतिनिधिसभा बैठक भोलि (विहीबार) बस्दैछ । प्रधानमन्त्री बालेन शाहले जवाफ नदिए भोलि बस्ने बैठकमा पनि विपक्षी दलहरुले विरोध जनाउने निश्चित जस्तै छ ।

संसदमा विपक्षी दलहरुले प्रधानमन्त्री बालेनको अभिव्यक्तिलाई लिएर अवरोध गर्न थालेको जेठ १७ गतेदेखि हो । जेठ १७ गतेको बैठकमा सांसदहरुसँगको प्रश्नोत्तरका क्रममा प्रधानमन्त्री बालेनले सीमा विवादसँग सम्बन्धित विषयमा दिएको अभिव्यक्ति विवादित बनेको छ ।

Watch On

सभामुख डोलप्रसाद (डीपी) अर्यालले यसअघि पनि आफ्नो अभिव्यक्तिका बारेमा स्पष्ट पार्न प्रधानमन्त्री बालेनलाई आग्रह गरेका थिए । तर, बालेन त्यसपछि रोस्ट्रममा उभिएर संसदलाई सम्बोधन गरेका छैनन् ।

भोलिदेखिका बैठक भने परिणामुखी र अवरोधरहित बनाउने सभामुख अर्यालको चाहना छ र सोही अनुसार पहल पनि गरेका छन् । त्यही पहल बमोजिम उनले संसदमा प्रतिनिधित्व गर्ने दलका प्रमुख सचेतक र सचेतक, संसदमा विपक्षी दलका नेता र एमाले संसदीय दलका नेतासँग छलफल गरे ।

सत्तारुढ र विपक्षी दलहरुसँग एकसरो छलफल गरेपछि सभामुख अर्यालले बुधबार (आज) अपराह्न प्रधानमन्त्री बालेनसँग एक घण्टा छलफल गरे । प्रधानमन्त्रीको कार्यालय सिंहदरबारमा प्रधानमन्त्री बालेनसँग भएको छलफलबाट सभामुख अर्याल संसद् बैठक अवरोध नहुनेमा आशावादी देखिएका छन् ।

‘प्रधानमन्त्रीज्यूसँग आज भएको छलफलले आशा जगाएको छ’ सभामुख अर्यालले सिधाकुरासँग भने ।

प्रधानमन्त्रीसँग ‘सदनमा विपक्षीको विरोध, सरकारले दिने बिजेनस, सदनको प्रभावकारी सञ्चालन र प्रधानमन्त्रीको योजना’ लगायत विषयमा छलफल भएको सभामुखको सचिवालयले जनाएको छ ।

मुख्य विषय विपक्षीले जारी राखेको विरोध थियो । ‘विपक्षीले निरन्तर अवरोध गरिरहेका छन्, यसमा तपाईंको योजना के छ ? भनेर सोधेँ’ सभामुख अर्यालले भने ।

सभामुखको यो प्रश्नमा प्रधानमन्त्री बालेनको जवाफ थियो– ‘म बिचार गर्छु।’

‘प्रधानमन्त्रीले बिचार गर्छु भन्नुभयो, पक्कै पनि उहाँले अवरोध खुलाउने पक्षमा नै बिचार गर्नु हुने छ भन्ने विश्वास छ’ सभामुख अर्यालले भने ।

प्रधानमन्त्रीको अभिव्यक्ति, सरकारका केही निर्णय, मन्त्रीहरुका अभिव्यक्ति तथा केही घटनाक्रमका कारण सरकारमाथि प्रश्न थपिरहेका छन् । गणेश नेपाली आत्मदाह प्रकरण र त्यसपछि मिडिया हाउसको गेटमा सरकार समर्थित व्यक्तिहरुले सवारी पार्किङ गरेको विषयले पनि सरकारमाथि प्रश्न उब्जाएको छ ।

संसदले छोटो समयमा धेरै कानुन बनाउनुपर्ने छ । कानुन बनाउन सरकारले नै सदनमा विधेयक दर्ता गर्नुपर्छ । विधेयक नै संसदको बिजनेस हो । बुधबार मात्रै मन्त्रिपरिषद बैठकले ९ विधेयकमा सदनमा दर्ता गर्न स्वीकृति दिने निर्णय गरेको छ । ती सबै विधेयक दर्ता भएमा सदनले बिजनेस पाउने छ ।

विपक्षी दलहरुले सदनमा प्रधानमन्त्री उपस्थित भएर यसअघिको अभिव्यक्ति स्पष्ट पार्न र नियमित प्रश्नोत्तर गर्न माग गरिरहेका छन् । प्रधानमन्त्रीमाथि रुलिङ गरेरै भए पनि आफूहरुको माग पूरा गर्न विपक्षी दलहरुले सभामुखमाथि दबाब दिइरहेका छन् ।

आजको छलफलपछि सभामुख अर्याल आशावादी देखिएका छन् र सदन बिनाअवरोध सञ्चालन हुने उनको अपेक्षा छ ।

सभामुख अर्यालले आजै राष्ट्रिय सभाका अध्यक्ष नारायणप्रसाद दाहालसँग छलफल गरे । दाहालसँगको भेटमा संसद्का समसामयिक विषय, संसदको प्रभावकारी सञ्चालन तथा विधायन प्रक्रियालाई थप सुदृढ बनाउने विषयमा छलफल भएको सभामुखको सचिवालयले जनाएको छ ।