मन्त्रीसँगको छलफलपछि सहकारी पीडितले फिर्ता लिए आन्दोलन

काठमाडौँ । सहकारी पीडितहरुले आफ्नो आन्दोलन फिर्ता लिएका छन् । भूमि व्यवस्था, सहकारी, सङ्‍घीय मामिला तथा सामान्य प्रशासनमन्त्री प्रतिभा रावलसँग छलफलपछि उनीहरु सडकमा आउन छोडेका हुन् । 

मंगलबार दिउँसो प्रदर्शनको नेतृत्व गरेका सहकारी पीडितहरुलाई मन्त्री रावलले मन्त्रालयमै भेट गरेकी थिइन् । मन्त्री रावलले आफूले काम गर्दा गर्दै उनीहरुले अनावश्यक दवाव दिनु उचित नभएको बताएकी थिइन् । उनले सहकारी पीडितका लागि आफूले मन्त्री भएपछि गरेका काम र पहलको फेहरिस्त नै बताएकी थिइन् । 

Watch On

सो क्रममा उनले आफूले सहकारीबाट पीडित बचतकर्ताका बचत रकम फिर्ता गर्न पहिलो दिनदेखि नै लागि परेको बताउँदै बचतकर्ताको साथ चाहिएको बताएकी थिइन् । ‘मलाई अहिले तपाईँहरुको दवाव होइन, सहयोगको खाँचो छ । कम्तिमा ६ महिनाको समय दिनुस् । म सहकारी पीडितका बचत रकम फिर्ता गराउन प्रतिवद्ध छु ।’ 

मन्त्रीसँगको उक्त भेटपछि सहकारी पीडितहरुले आफ्ना सबै आन्दोलनका कार्यक्रमहरु फिर्ता लिएका छन् । सहकारी बचतकर्ता संरक्षण अभियानका अध्यक्ष कुशलव केसीले तत्कालका लागि विरोधका कार्यक्रम फिर्ता गरिएको बताए । ‘त्यो आन्दोलन होइन, ध्यानाकर्षण थियो । सरकारका निकायबाट सरकारले भनेजस्तो कार्य नभएपछि ध्यानाकर्षण गराउन हामी माइतिघरमा जम्मा भएका थियौँ ।’ उनले भने, ‘मन्त्री ज्यूले त्यसलाई सकारात्मक रुपमा लिनुभयो र तत्काले त्यसलाई सच्याउने प्रतिवद्धता व्यक्त गरेपछि सडकमा नआएका हौँ ।’ 

मंगलबार ठूलो संख्यामा सहकारी पीडितहरु माइतिघरमा भेला भएका थिए । उनीहरुको आरोप थियो, मिलापत्रका नाममा सरकारले थप पीडा दिन खोज्यो । 

उनीहरुले दिनभरजसो काठमाडौँको माइतिघरमा धर्नाका साथै पर्चा, पम्प्लेट प्रदर्शन गरेका थिए । सहकारी बचतकर्ता संरक्षण राष्ट्रिय अभियानको नेतृत्वमा उक्त प्रदर्शन आयोजना भएको थियो । मंगलबार माइतिघरमा जम्मा भएका सहकारी पीडितहरुको संख्याले उनीहरुको आन्दोलन थप चर्कने आंकलन सुरु भएको थियो । तर मन्त्रीसँगको सामान्य छलफलपछि उनीहरुले आन्दोलनका कार्यक्रम फिर्ता लिएका हुन् । 

भूमि व्यवस्था, सहकारी, सङ्‍घीय मामिला तथा सामान्य प्रशासन मन्त्रालयको नेतृत्वमा प्रतिभा रावल आएपछि ऐन तथा कानुनमा रहेका अड्चन हटाउँदै सहकारी पीडितका रकम फिर्ताको प्रक्रिया चलिरहेको छ । सहकारीका ऋणीहरुबाट ऋण असुली गर्दै साना बचतकर्ताको रकम फिर्ता भइरहेको छ । दैनिकजसो साना बचतकर्ताहरुले आफ्नो रकम फिर्ता पाइरहेका छन् ।