समाज

आज कहाँ कहाँ छ कर्फ्यु र निषेधाज्ञा ?

सिधाकुरा

शुक्रबार, साउन १५, २०८३

कर्फ्यु लागेपछि सिरहा गोलबजारको अवस्था

काठमाडौँ । आइतबार राति सुनसरीको देवानगञ्ज(३ कप्तानगञ्जमा दुई पक्षबीच भएको झडपपछि कोशी र मधेश प्रदेशका विभिन्न जिल्लामा उत्पन्न तनाव आज केही मत्थर भए पनि जनजीवन अझै सहज भएको छैन ।

आज पनि चार जिल्लाका विभिन्न ठाउँमा कर्फ्यु लागिरहेको छ भने एक जिल्लामा निषेधाज्ञा छ ।

Watch On

गृहमन्त्री सुधन गुरुङले कप्तानगञ्ज घटनामा मृत्यु भएका २ जनाको परिवारसँग गएराति सहमति गरेसँगै हिंसात्मक प्रदर्शन रोकिएको छ भने सिरहा गोलबजारमा हिजो मृत्यु भएका १ व्यक्तिको परिवारसँग पनि आज गृहमन्त्रीले वार्ता गरी सहमति गर्ने तयारी छ ।

प्रहरी प्रवक्ता अबिनारायण काफ्लेका अनुसार गृहमन्त्री गुरुङ सुनसरीबाट सिरहा पुगेका छन् ।

प्रहरीका अनुसार, आज सुनसरी, सिरहा, सप्तरी र धनुषामा कर्फ्यु लागेको छ। सुनसरी कोशी प्रदेशमा पर्छ भने सिरहा, सप्तरी र धनुषा मधेश प्रदेशमा पर्छ ।

त्यस्तै मधेश प्रदेशको पर्सा (वीरगञ्जमा) भने निषेधाज्ञा जारी छ ।

जिल्ला प्रशासन कार्यालय पर्साले आज साँझ ५ बजेदेखि भोलि बिहान ६ बजेसम्मका लागि वीरगन्जमा निषेधाज्ञा लगाएको हो । जिल्ला सुरक्षा समितिको निर्णयानुसार वीरगन्जमा पाँच जनाभन्दा बढी मानिसहरु जम्मारभेला हुन, सभा, जुलुस तथा प्रदर्शन गर्न पाइँदैन ।

प्रकाशित मिति: शुक्रबार, साउन १५, २०८३

प्रतिक्रिया दिनुहोस्