संसदमा अमरेशको प्रश्नः मधेशमा आन्दोलन हुनासाथ किन गोली चल्छ ?

काठमाडौँ । राष्ट्रिय स्वतन्त्र पार्टी (रास्वपा) सांसद अमरेशकुमार सिंहले मधेशमा आन्दोलन हुँदा साथ किन गोली चल्छ भन्ने प्रश्न गरेका छन् । 

राज्यले लाठि र अश्रुग्याँसमा भन्दा बढी बन्दुकमा लगानी गरेको भन्दै मंगलबार प्रतिनिधिसभा बैठकमा सांसद सिंहले भने ‘मेरो प्रश्न राज्यसँग छ, मधेशमा जहिले पनि केही समुदायको आन्दोलन हुँदा गोली मात्रै किन चल्छ ? लाठि किन चल्दैन ? टियरग्यास किन चल्दैन ?, प्रहरीलाई कसैले ढुंगा हान्यो भने उसले गोली हान्छ । किनभने उसलाई टियर ग्यास र लाठ्ठी दिइएको छैन ।’

Watch On

उनले मधेशलाई पछि पार्ने, गरिब बनाउने र गोली चलाइहाल्ने प्रवृत्तिको अन्त्य हुनुपर्ने उल्लेख गर्दै भने, ‘सरकारसँग आग्रह गर्न चाहन्छु, टियरग्यास र लाठिको व्यवस्था गरोस् । मधेशलाई पछाडि पार्ने, गरिब बनाउने र केही भयो भने गोली ठोक्ने प्रवृत्ति अन्त्य हुनुपर्छ । किनभने मधेशले धेरै सहन सक्दैन।’

सांसद सिंहले सामाजिक सद्भावकोलागि आम समुदायलाई अपिल गर्दै भने, ‘आजको आवश्यकता गरिबीसँग लड्ने, त्यो पिछडिएको पनसँग लड्ने हो, असमानतासँग लड्ने हो, समुदाय समुदाय बीच लड्ने समय होइन ।’

साथै उनले सुनसरी घटनाको सन्दर्भमा रास्वपा सभापति रवि लामिछानेले सर्वदवलीय बैठक राखेकोमाा धन्यवाद दिदै प्रधानमन्त्रीले पनि ढिलै भएपनि राष्ट्रको नाममा सम्बोधन गरेको उल्लेख गरे ।