सदनमा विपक्षीले सुकुमबासीलाई लालपूर्जा देउ भन्ने, पालिकामा अवरोध गर्ने ?- मन्त्री रावल

काठमाडाैँ । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले सुकुमबासी, भूमिहीन तथा अव्यवस्थित बसोबासीको पहिचान तथा लालपुर्जा वितरणमा विपक्षी दलबाट असहयोग भएको गुनासो गरेकी छिन् । 
सदनमा विपक्षी दलहरुले वास्ताविक सुकुमबासी एवं भूमिहीनलाई लालपूर्जा उपलब्ध गराउ भन्दै जरुरी सार्वजनिक महत्त्वको प्रस्ताव दर्ता गरेर दबाब दिएको तर तल विपक्षी दलहरुकै नेतृत्वमा प्रदेश र स्थानीय सरकारले अड्काएर अगाडि बढ्न नदिएको गुनासो मन्त्री रावलले गरेकी हुन् । 
कांग्रेस, एमाले र नेकपालगायत पुराना दलले सम्हालेको १४ वटा पालिकाले असहयोग गरेको तथ्यांक उनले सदनमै प्रस्तुत गरिन् । 
मन्त्री रावलले भनिन्,'हालसम्म जहाँ जहाँ उहाँहरुको विवरण पठायौ सम्बन्धित जिल्ला र पालिकामा, उहाँहरुको हकमा सम्बन्धित पालिका र वडाले सूचना निकालिदिनुपर्ने थियो । तर, चारवटा पालिकाबाहेक जहाँ जहाँ पठाइएको थियो, उनीहरुले त्यो परिवारको सूचना नै निकालिदिनु भएन । १४ वटा पालिकाले सूचना निकालिदिनुभएन । '

मन्त्री रावलले थप भनिन् ,'लालपूर्जा वितरण गर्नुपर्छ भनेर जरुरी महत्त्वको प्रस्ताव जुन विपक्षी दलहरुले ल्याउनुभयो, त्यो महसुस उहाँहरुले पालिकामा पनि गर्नुपर्यो । त्यही भएर सार्वजनिक महत्त्वको प्रस्ताव यहाँ दर्ता भएर छलफल भइरहेको छ, यसको एउटा कपी भए पनि सम्बन्धित पालिकालाई पठाइदिउ । पत्राचार गरिदिउ । त्यसले तपाईहरुको अपनत्व देखाउँछ । विपक्षी दललाई पनि लागेको कुरा यही हो, सुकुमबासी, अव्यवस्थित बसोबासीले छिटोभन्दा छिटो लालपूर्जा पाउनुपर्छ भन्ने कुरा विपक्षीले फिल गरेको छ भन्ने कुरा पालिका प्रमुखले पनि फिल गर्नुपर्याे '। 

Watch On

मन्त्री रावलले स्थानीय तहमा पनि सबै राजनीतिक दलले सहयाेग गर्न आग्रह गरिन् । उनले भनिन्,'मकवानपुर गढी गाउँपालिका, मिथिला नगरपालिका, भोजपुर नगरपालिकामा परिपत्र गरिएको छ । यी पालिका प्रमुख नेपाली कांग्रेसबाट छन् । 
सरकारबाट अनुरोध गर्न चाहन्छु कि जस्तो खालको गम्भीर छलफल यहाँ भएको छ, जति गम्भीरताका साथ माननीयहरुले कुरा राख्नुभयो, यो कुरा तल सर्कुलर हुनुपर्यो । प्रदेश र पालिकामा सर्कुलर गर्नुपर्यो '।