सरकारको नियतमा प्रश्न छैन, सञ्चालनको ढंग पुगेन कि– मनिष झा

काठमाडौं । राष्ट्रिय स्वतन्त्र पार्टी (रास्वपा) का सांसद मनिष झाले सरकारको नियत र इमानदारीमा प्रश्न गर्ने ठाउँ नरहे पनि सरकार सञ्चालनको शैलीमा भने कमजोरी देखिएको बताएका छन् ।

प्रतिनिधिसभाको शुक्रबार बैठकलाई सम्बोधन गर्दै सांसद झाले सरकारको काम गर्ने शैलीमा कताकता ढंग नपुगेको महसुस भएको र त्यसलाई सरकारले स्वीकार गरेर जानुपर्ने बताए ।

Watch On

उनले वर्तमान परिस्थितिमा लोकतान्त्रिक राज्य सञ्चालन, संविधानको संरक्षण र राज्यप्रति नागरिकको भरोसा कायम राख्न राज्यप्रतिको भरोसा र राष्ट्रप्रतिको आत्मविश्वासलाई मूलमन्त्र बनाउनुपर्ने बताए ।

‘राज्य प्रणालीमा, राज्य सञ्चालनमा, संविधान र लोकतन्त्रको संरक्षणमा के मूलमन्त्र आवश्यक छ भनेर हेर्दा राज्यप्रतिको भरोसा र राष्ट्रप्रतिको आत्मविश्वास आवश्यक देखिन्छ,’ उनले भने, ‘यी दुई कुरालाई लक्षित गरेर राज्य सञ्चालन र हाम्रा सबै पद्धतिलाई केन्द्रित गरियो भने हामी केही हासिल गर्न सक्छौं ।’

सांसद झाले वर्तमान सरकारको योजना र उद्देश्यमा खराबी नदेखिएको तर त्यसलाई कार्यान्वयन गर्ने शैलीमा समस्या रहेको बताए ।

‘अहिलेको कुरामा इन्टिग्रिटीको प्रश्न छैन । इन्टिग्रिटीमा कुनै पनि शंका छैन । इन्टेन्सनमा पनि कुनै प्रश्न छैन,’ उनले भने, ‘तर कताकता ढंग नपुगेको हो कि भन्ने लाग्छ । र त्यो स्वीकार्नुपर्छ ।’

सरकारले आफ्नो कमजोरी स्वीकार गरेर सिक्ने र सुधार्ने क्षमता विकास गर्नुपर्ने उनको भनाइ थियो ।

कम ज्ञान भएका व्यक्तिमा आफूलाई आवश्यकताभन्दा बढी जान्ने र आफ्नो क्षमताको बढी मूल्यांकन गर्ने प्रवृत्ति देखिन सक्ने भन्दै झाले सरकारलाई आत्ममूल्यांकन गर्नसमेत सुझाव दिए ।

उनले अंग्रेजीको भनाइ उद्धृत गर्दै आफूलाई के थाहा छैन भन्ने थाहा पाउनु र आवश्यक कुरा सिक्नु महत्त्वपूर्ण रहेको बताए ।

आफूलाई सबै कुरा थाहा भइसकेको महसुस गर्ने दिनदेखि सिकाइ र सुधारको प्रक्रिया रोकिने उनको आशय थियो ।

‘हामीले हरेक दिन यो राज्य प्रणालीको सञ्चालनका कुरामा अझै ढंग सुधार्नुपर्छ कि जस्तो लाग्छ,’ उनले भने ।

सांसद झाले राज्य सञ्चालनलाई समाजको शिक्षा, राजनीति, लोकतन्त्र, सामाजिक सन्तुलन र न्यायसँग जोडेर हेर्नुपर्ने धारणा राखे ।

‘समाज शिक्षित नभएसम्म त्यहाँ राजनीति जीवित रहँदैन । यदि राजनीति जीवित छैन भने लोकतन्त्र जीवित हुँदैन,’ उनले भने, ‘यदि लोकतन्त्र जीवित छैन भने त्यस्तो समाजमा सामाजिक सन्तुलन जीवित रहँदैन । समाजमा सामाजिक सन्तुलन छैन भने सामाजिक न्याय जीवित रहँदैन ।’

उनले नेपालको दिगोपन र अर्थतन्त्रमा महत्वपूर्ण योगदान पु¥याउने मधेश, प्रवास र निजी क्षेत्रलाई राज्यले विशेष प्राथमिकतामा राख्नुपर्ने बताए । तर अहिले यी तीनै क्षेत्र असुरक्षित र त्रसित रहेको उनको टिप्पणी थियो ।

मधेशमा केही समयअघि देखिएको तनावलाई संकेत गर्दै झाले समस्या तत्काल साम्य भए पनि त्यसको आधारभूत कारण समाधान भइनसकेको बताए ।

‘मधेशमा भर्खरै आगो बल्यो । हामीले जसोतसो निभाउन सक्यौं । तर म यो सम्मानित सदनबाट सरकारलाई सन्देश दिन चाहन्छु—आगो निभेको हो, दाउरा निभेको छैन,’ उनले भने ।

उनले सीमा क्षेत्रमा राज्यले गर्ने व्यवहार र विमानस्थलमा हुने व्यवहारबीच देखिएको अन्तरप्रति पनि प्रश्न उठाए ।

‘त्यहाँ २५ रुपैयाँको चिप्स खोसिन्छ । तर सन्तुलन छैन भन्ने कुरा हेर्नुस् न, एयरपोर्टमा त ब्लु लेबल र ल्यापटप ल्याउन दिनुभएको छ । अनि मधेशको बोर्डरमा २५ रुपैयाँको चिप्स किन खोसिँदैछ ?’ उनले प्रश्न गरे ।

सीमाबाट आउने गरिब नागरिक र विमानस्थलबाट आउने धनी नागरिकलाई राज्यले फरक व्यवहार गर्न नहुने उनको भनाइ थियो ।

‘बोर्डरबाट आउने गरिबलाई एउटा व्यवहार र एयरपोर्टबाट आउने धनीलाई अर्को व्यवहार किन? कहाँसे आते है ये लोग? और कहाँसे आते है ये सोच? भन्ने ठूलो प्रश्न जनताले सोधिरहेका छन्,’ उनले भने ।

राज्यका व्यवहारमा सन्तुलन कायम हुन नसके त्यसले नागरिकमा राज्यप्रतिको भरोसा कमजोर बनाउने उनले बताए ।