ग्यास अभाव हुँदैन, अनावश्यक सिलिन्डर सञ्चय नगर्न ग्यास उद्योग संघको आग्रह

काठमाडौं । नेपाल एलपी ग्यास उद्योग संघले भारतबाट ग्यासको आयात बढिरहेकाले बजारमा ग्यासको अभाव नहुने जनाएको छ। संघले उपभोक्तालाई आवश्यकताभन्दा बढी ग्यास खरिद गरी सिलिन्डर सञ्चय नगर्न आग्रह गरेको छ।

संघका अध्यक्ष दिवानबहादुर चन्दले शुक्रबार विज्ञप्ति जारी गर्दै भारतबाट सहज रूपमा एलपी ग्यास आयात भइरहेको र उद्योगहरूले सिलिन्डर रिफिल गरी निरन्तर बजारमा पठाइरहेकाले ग्यास अभावको अवस्था नरहेको बताएका हुन्।

Watch On

‘उपभोक्ताले अतिरिक्त ग्यास खरिद नगर्ने हो भने अहिले देखिएको ग्यास अभावको समस्या तत्कालै समाधान हुन्छ। आगामी दिनमा पनि ग्यास आपूर्तिमा समस्या नहुने भएकाले अभाव देखिने सम्भावना छैन,’ विज्ञप्तिमा भनिएको छ।

नेपाल आयल निगमका अनुसार पछिल्लो २२ दिनमा भारतका विभिन्न रिफाइनरीबाट ३९ हजार ७७४ मेट्रिकटन एलपी ग्यास आयात भएको छ। ग्यासको आयात अघिल्लो अवधिको तुलनामा करिब १५ प्रतिशतले बढेको निगमले जनाएको छ।

यो गतिलाई आधार मान्दा चालु आर्थिक वर्षको साउनमा करिब ५५ हजार मेट्रिकटन ग्यास आयात हुने अनुमान गरिएको छ। गत आर्थिक वर्षको सोही अवधिमा ४४ हजार ३१८ मेट्रिकटन ग्यास आयात भएको थियो।

संघले बजारको मागअनुसार ग्यास उपलब्ध गराउन उद्योगहरूले हरसम्भव प्रयास गरिरहेको जनाएको छ। साथै, बिक्रेताहरूलाई घरायसी प्रयोजनका उपभोक्तालाई प्राथमिकतामा राखेर ग्यास बिक्री–वितरण गर्न आग्रह गरेको छ।