नेताका कुरा

हेटौँडा कपडा उद्योग पुनः सञ्चालनमा ल्याउने तयारीप्रति प्रचण्डको स्वागत

सिधाकुरा

सोमबार, साउन २५, २०८३

हेटौँडा कपडा उद्योग पुनः सञ्चालनमा ल्याउने तयारीप्रति प्रचण्डको स्वागत

फाइल फोटो

काठमाडौं । पूर्वप्रधानमन्त्री पुष्पकमल दाहाल ‘प्रचण्ड’ले हेटौँडा कपडा उद्योग पुनः सञ्चालनमा ल्याउने सरकारको तयारीप्रति खुसी व्यक्त गरेका छन्।

प्रचण्डले आफ्नो नेतृत्वको सरकारले हेटौँडा कपडा उद्योगको सम्भाव्यता अध्ययन तथा प्रतिवेदन तयार गरी आर्थिक वर्ष २०८१/८२ को नीति तथा कार्यक्रममा हेटौँडा कपडा उद्योगसहित गोरखकाली रबर उद्योग, विराटनगर जुट मिल र बुटवल धागो कारखाना पुनः सञ्चालन गर्ने योजना अघि सारेको स्मरण गरेका छन्।

Watch On

सरकारबाट बाहिरिएसँगै रोकिएको प्रक्रिया पुनः अघि बढ्नु सुखद भएको उल्लेख गर्दै उनले हेटौँडा कपडा उद्योगसँगै सम्भावना भएका अन्य सार्वजनिक उद्योगलाई पनि आधुनिक प्रविधि, व्यावसायिक व्यवस्थापन र स्पष्ट कार्ययोजनासहित सञ्चालनमा ल्याउन आग्रह गरेका छन्।

उद्योग पुनः सञ्चालनले कपडा उपभोगमा रहेको आयातनिर्भरता घटाउनुका साथै उत्पादन वृद्धि, रोजगारी सिर्जना र राष्ट्रिय अर्थतन्त्रमा महत्वपूर्ण योगदान पुर्‍याउने उनको विश्वास छ।

‘देशमा उत्पादन बढाउने, आयात घटाउने र रोजगारी सिर्जना गर्ने दिशामा यस्ता उद्योगको पुनरुत्थान महत्वपूर्ण कदम हुनेछ,’ प्रचण्डले भनेका छन्। उनले हेटौँडा कपडा उद्योग पुनः सञ्चालनको पहलका लागि सरकारलाई धन्यवाद दिँदै प्रक्रिया परिणाममुखी ढंगले अघि बढाउन आग्रह गरेका छन्।

प्रकाशित मिति: सोमबार, साउन २५, २०८३

प्रतिक्रिया दिनुहोस्