‘इन्टर्न डाक्टरको दुःखलाई सरकारी र निजी भनेर विभेद नगरौँ’

काठमाडौं । राष्ट्रिय स्वतन्त्र पार्टी (रास्वपा) की सचेतक क्रान्तिशिखा धितालले इन्टर्न डाक्टरलाई सरकारी र निजी मेडिकल कलेजका आधारमा विभेद गर्न नहुने बताएकी छन् ।

मंगलबार प्रतिनिधि सभाको बैठकमा बोल्दै उनले मुलुकबाट डाक्टर पलायन भइरहेको अवस्थामा चिकित्सकलाई स्वदेशमै टिक्न सक्ने वातावरण बनाउनुपर्ने बताइन् ।

Watch On

‘एउटा विद्यार्थी एमबीबीएस पढेर निस्कँदा लाखौँ खर्च हुन्छ । इन्टर्न डाक्टरले निजी मेडिकल कलेजमा सरदर १० हजार र सरकारी मेडिकल कलेजमा सरदर २४ हजार पेरिफेरी पाएको अवस्था छ,’ उनले भनिन्, ‘निजी र सरकारी मेडिकल कलेजले एउटै मापदण्ड बनाउन त्यति प्राक्टिकल नहोला, तर यति धेरै अन्तर हुनु पनि स्वाभाविक र न्यायोचित होइन ।’

उनले इन्टर्न डाक्टरको पारिश्रमिकमा देखिएको विभेद हटाउन सरकारले स्पष्ट कार्यविधि बनाएर कार्यान्वयन गर्नुपर्ने बताइन् ।

‘कम्तीमा दुःख र अपमानलाई सरकारी र निजी नबनाऔँ । इन्टर्न डाक्टरलाई कतिसम्म पे गर्ने भन्ने स्पष्ट कार्यविधि बनाऔँ र कार्यान्वयनमा लैजाऔँ,’ धितालले भनिन् ।

निजी मेडिकल कलेजहरूले सरकारले तोकेको व्यवस्था आफूहरूले पालना गरिरहेको बताउने गरेको उल्लेख गर्दै उनले सरकारलाई आफ्नै प्रतिबद्धता पूरा गर्न आग्रह गरिन् ।

‘निजी मेडिकल कलेज भन्छ, सरकारले भनेको कुरा हामीले मानिराखेका छौँ । अनि सरकारले आफैँले गरेको वाचा पूरा गर्नुपर्दैन?’ उनले प्रश्न गरिन् ।

डाक्टर पलायनको समस्या गम्भीर बन्दै गएको भन्दै धितालले चिकित्सकलाई स्वदेशमै टिकाउन राज्यले सुरक्षा र सम्मानको वातावरण बनाउनुपर्नेमा जोड दिइन् ।

‘सहकार्य र जिम्मेवारीमा समान बनाऔँ । चिकित्सा शिक्षा सेवा हो । सेवा गर्नेलाई राज्यको सुरक्षा पनि चाहिन्छ, सेक्युरिटी दिन पनि सक्नुपर्छ,’ उनले भनिन् ।