राजा ज्ञानेन्द्रले सकेनन्, अरूले सक्छ यहाँ? : देउवा

काठमाडौं । नेपाली कांग्रेसका पूर्वसभापति शेरबहादुर देउवाले आफूविरुद्ध भइरहेका कानुनी कारबाही र पक्राउको प्रयासप्रति प्रश्न उठाउँदै पूर्वराजा ज्ञानेन्द्रले समेत आफूलाई जेलमा राख्न नसकेको भन्दै ‘राजा ज्ञानेन्द्रले सकेनन्, अरूले सक्छ यहाँ?’ भनेर प्रश्न गरेका छन् ।

बिहीबार स्वदेश फर्किएका पूर्वसभापति देउवाले चुनदेवी पुगेर आफूलाई निष्पक्ष न्याय दिएको अदालतप्रति विश्वास रहेको बताएका हुन्। उनले विगतमा आफूविरुद्ध भएका कानुनी कारबाही र सम्पत्ति शुद्धीकरणसम्बन्धी छानबिनको प्रसंग निकाल्दै पटक–पटक अनुसन्धान भए पनि केही नदेखिएको दाबी गरे ।

Watch On

‘सम्पत्ति शुद्धीकरण आयोग आयो । एकपल्ट आयो, केही छैन भन्यो । दोस्रोपल्ट आयो, केही छैन भन्यो । फेरि कुरा निकाल्यो । यतिसम्म बदमासी काम भइरहेको छ,’ देउवाले भने ।

आफूमा बदलाको भावना नरहेको भन्दै उनले राजनीतिक तथा कानुनी प्रक्रियाबाट आफूहरू पछि नहट्ने बताए । ‘तर मलाई बदलाको भाव छैन । यिनीहरूलाई हामी देखाएर छाड्छौँ,’ उनले भने ।

आफूलाई विगतमा पूर्वराजा ज्ञानेन्द्रको शासनकालमा गठित शाही आयोगले मुद्दा चलाएको स्मरण गर्दै देउवाले अदालतले उक्त आयोग नै खारेज गरिदिएको बताए ।

‘पूर्वराजा ज्ञानेन्द्रले शाही आयोगमा मुद्दा गरेका हुन् । अदालतले शाही आयोग खारेज गरेर मलाई जेलबाट छुटाएको हो,’ उनले भने ।

देउवाले आफूविरुद्ध अन्तर्राष्ट्रिय फौजदारी अदालतमा समेत मुद्दा हालिएको दाबी गरे । उनका अनुसार अन्तर्राष्ट्रिय फौजदारी अदालतले आफूलाई पक्राउ नगर्ने जवाफ दिएको थियो ।

‘अस्ति पनि मलाई अन्तर्राष्ट्रिय क्रिमिनल कोर्टमा पनि मुद्दा हाल्यो । अन्तर्राष्ट्रिय क्रिमिनल कोर्टले शेरबहादुरलाई हामी कुनै पनि हालतमा पक्रँदैनौँ भन्यो,’ उनले भने ।

नेपालमा समेत आफू र कांग्रेस नेतृ आरजु राणा देउवालाई पक्राउ गर्नुपर्ने भन्दै मुद्दा हालिएको दाबी गर्दै देउवाले अदालतले छाडिसकेका व्यक्तिलाई फेरि पक्राउ गर्नुपर्ने आवाज उठाइएकोप्रति प्रश्न गरे ।

‘यहीँ पनि मुद्दा हाल्यो । त्यस्ता फटाहा छन् यहाँ । अदालतले छोड्दा पनि शेरबहादुर देउवा र आरजु राणालाई पक्रनु भन्यो,’ उनले भने ।

आफूविरुद्ध भइरहेका गतिविधिबारे जनता र अदालत जानकार रहेको भन्दै देउवाले न्यायपालिकामाथि आफ्नो विश्वास कायमै रहेको बताए ।

‘तर यो देशमा जनता छ, अदालत छ, सबले जानेको छ, बुझेको छ,’ उनले भने ।