ताप्लेजुङका अगुवाले भेटे सभापति लामिछाने, यी विषयमा गराए ध्यानाकर्षण

ताप्लेजुङ । ताप्लेजुङका सरोकार भएका निकायका प्रतिनिधिले बिहीबार राष्ट्रिय स्वतन्त्र पार्टी (रास्वपा)का सभापति रवि लामिछानेसँग भेट गरी सडक विस्तारलगायत जिल्लाका विकास निर्माणका विविध विषयमा ध्यानाकर्षण गराएका छन् । 

ताप्लेजुङ उद्योग वाणिज्य सङ्घका अध्यक्ष नारायण थापासहितको प्रतिनिधिमण्डलले सभापति लामिछानेसँग भेट गरी मेची राजमार्गअन्तर्गत फुङलिङ नगरपालिका–८ खोक्सेखोलाबाट सुकेटारसम्मको सडक सीमा पुनरावलोकनका लागि पहल गरिदिन आग्रह गरेको हो । 

Watch On

सडक डिभिजन कार्यालय इलामले गत जेठ १३ गते मेची राजमार्गको सडक सीमाअन्तर्गत सडकको केन्द्रबाट दायाँ–बायाँ १५–१५ मिटरभित्र रहेका संरचना हटाउन सूचना जारी गरेको थियो । त्यसपछि फुङलिङ नगरपालिकाको कार्यालयमा सडक आसपासका बासिन्दासहित छलफल भएको थियो । 

उक्त छलफलको निर्णयमा उल्लेख भएअनुसार २०५४ सालमा सहरी विकास तथा भवन निर्माण कार्यालय स्थापना भएपछि सडकको दायाँ–बायाँ ७.५/७.५ मिटर चौडाइ कायम गरी घरजग्गा खरिद तथा संरचना निर्माण गर्न अनुमति दिइएको थियो । सोहीअनुसार जग्गा खरिद गरी घर तथा अन्य संरचना निर्माण गरेर स्थानीय बासिन्दा बसोबास गर्दै आएको सङ्घका अध्यक्ष थापाले बताए ।

विसं २०७२ मा सरकारले मेची राजमार्गको मापदण्ड सडकको केन्द्रदेखि दायाँ–बायाँ १५/१५ मिटर कायम गर्ने निर्णय गरेपछि ती क्षेत्रका जग्गा रोक्का भएका छन् । उनका अनुसार जग्गा रोक्का हुँदा आफूहरूले त्यसको उपभोग गर्नबाट वञ्चित हुनुपरेको बजारवासीको गुनासो छ । यस क्षेत्रमा वैकल्पिक सडकसमेत निर्माण भइसकेकाले रोक्का रहेका घरजग्गा फुकुवा गर्न सरकारसँग अनुरोध गर्ने निर्णय यसअघि भएको थियो । 

भेटका क्रममा मेची राजमार्गको सडक सीमा पुनरावलोकनका साथै जिल्लाका विभिन्न विकास निर्माणका विषयमा सभापति लामिछानेलाई जानकारी गराइएको र सकारात्मक प्रतिक्रिया पाइएको रास्वपाका स्थानीय नेता दुर्गा न्यौपानेले बताए । सडकका सन्दर्भमा अध्ययन र छलफल हुने सभापति लामिछानेले प्रतिक्रिया दिएको न्यौपानेले बताए ।