देउवा फर्केपछि के भने गगन थापाले ?

काठमाडौँ । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा बिहीबार स्वदेश फर्किए । उनलाई समर्थक र शुभेच्छुकले भव्य स्वागत गरे । देउवाले आफू नेताको रुपमा होइन नागरिकको रुपमा फर्किएको प्रतिक्रिया दिएपछि उनको आगमन र सक्रियता कुनै नेताभन्दा कम छैन । देउवाले आज इतर समूहको राष्ट्रिय भेलालाई सम्बोधन नै गर्दैछन् ।

देउवा आउँदा इतर समूह उत्साहित भएका बेला सभापति गगन थापाको नेतृत्वमा रहेको संस्थापन भने केन्द्रीय समिति बैठक सञ्चालन गरिरहेको छ । तीन चार दिनयता निरन्तर केन्द्रीय समितिमा छलफल गरिरहेको संस्थापनले देउवाको आगमनलाई स्वागत गरेको छ । 

Watch On

संस्थापनले केन्द्रीय समितिबाटै पूर्व सभापतिप्रति स्वागत तथा शुभकामना व्यक्त गरेको छ । 

प्रवक्ता देवराज चालिसेकाअनुसार केन्द्रीय कार्यसमितिको बैठकले पार्टीका निवर्तमान सभापति एवं पूर्व प्रधानमन्त्री देउवा लामो समयको स्वास्थ्य उपचारपछि स्वदेश फर्किएकोमा  स्वागत गरेको छ भने देउवाको पूर्ण स्वास्थ्यलाभको कामना गरेको छ  । 

देउवाले विशेष महाधिवेशनबाट भएको परिवर्तनलाई स्वीकारेर पार्टी निर्माणमा अभिभावकीय भूमिका खेल्ने अपेक्षा गगन नेतृत्वको संस्थापन पक्षको छ । 

'नेपाली कांग्रेसको गर्विलो इतिहास निर्माणमा उहाँको भूमिका एवं लोकतान्त्रिक आन्दोलनमा गर्नु भएको नेतृत्वप्रति हार्दिक सम्मान प्रकट गर्दछ । पार्टी र देशमा विधि र पद्धति स्थापित गर्न लामो संघर्ष गर्नुभएका आदरणीय नेता (देउवा) ले विशेष महाधिवेशन मार्फत पार्टीमा आएको वैधानिक परिवर्तनलाई संस्थागत गर्दै समयसापेक्ष र गतिशील नेपाली कांग्रेस निर्माणका लागि निवर्तमान सभापतिका रूपमा अभिभावकीय भूमिका निर्वाह गर्नुहुनेछ भन्नेमा यो बैठक पूर्ण विश्वास व्यक्त गर्दछ,' बैठकको निर्णयमा भनिएको छ ।