काठमाडौं विश्वविद्यालयको उपकुलपतिमा प्रा.डा. विवेक बराल नियुक्त

काठमाडौं । काठमाडौं विश्वविद्यालय (केयू)को उपकुलपतिमा प्रा.डा. विवेक बराल नियुक्त भएका छन् । विश्वविद्यालयका कुलपतिसमेत रहेका प्रधानमन्त्री बालेन्द्र शाहले बराललाई उपकुलपतिमा नियुक्त गरेका हुन् ।

शिक्षा तथा खेलकुदमन्त्री सस्मित पोखरेलको अध्यक्षतामा गठित सिफारिस समितिले बरालको नाम उपकुलपतिका लागि सिफारिस गरेको थियो । समितिले प्रस्तुतिकरण र अन्तर्वार्तासहितको प्रक्रियाबाट मेरिटका आधारमा उनको नाम सिफारिस गरेको जनाएको थियो ।

Watch On

केयूको मेकानिकल इन्जिनियरिङ विभागका प्राध्यापक बराल आफैले अध्ययन गरेको यही विश्वविद्यालयको उपकुलपति बन्ने पहिलो व्यक्ति हुन् ।

बरालले केयूबाट मेकानिकल इन्जिनियरिङमा स्नातक, जापानको टोकियो विश्वविद्यालयबाट स्नातकोत्तर र न्युजिल्यान्डको अकल्यान्ड विश्वविद्यालयबाट विद्यावारिधि गरेका छन् ।

इन्धन तथा ऊर्जा, दहन विज्ञान तथा वातावरणीय प्रदूषण, थर्मोफ्लुइड इन्जिनियरिङ र कम्प्युटेसनल फ्लुइड डाइनामिक्स उनको विज्ञताको क्षेत्र हो ।

केयूमा उपप्राध्यापक र सहप्राध्यापक हुँदै प्राध्यापक बनेका बरालले ऊर्जा, वातावरण, बायोमासबाट ऊर्जा, थर्मोडाइनामिक्स, फ्लुइड मेकानिक्स, हिट ट्रान्सफर, इन्टरनल कम्बसन इन्जिन तथा हिट एन्ड पावर इन्जिनियरिङलगायत विषय अध्यापन गर्दै आएका छन् ।

केयूको उपकुलपतिका लागि ३५ जनाले आवेदन दिएका थिए । तीमध्ये १० जनालाई सर्टलिस्ट गरी प्रस्तुतिकरण तथा अन्तर्वार्तामा सहभागी गराइएको थियो । सोही प्रक्रियाबाट बरालको नाम सिफारिस गरिएको हो ।

उनलाई केही बेरमा पद तथा गोपनीयताकाे शपथ गराउने तयारी भइरहेको प्रधानमन्त्री तथा मन्त्रिपरिषद् कार्यालयले जानकारी दिएको छ ।