मर्यादित रोजगारी र नीतिगत सुधारमार्फत श्रम बजारलाई आकर्षक बनाइनेछ : श्रममन्त्री यादव

विराटनगर । युवा, श्रम तथा रोजगारमन्त्री रामजी यादवले युवालाई स्वदेशमै रोजगारीका पर्याप्त अवसर सिर्जना गरी राष्ट्र निर्माणमा जोड्न मन्त्रालयले नीतिगत तथा संरचनागत सुधारलाई प्राथमिकताका साथ अघि बढाएको बताएका छन् ।

श्रम तथा रोजगार कार्यालय मोरङको नयाँ भवन उद्घाटन समारोहलाई सम्बोधन गर्दै मन्त्री यादवले नयाँ भवनबाट सेवा प्रवाह थप सहज, व्यवस्थित, प्रभावकारी र प्रणालीबद्ध हुने विश्वास व्यक्त गरे ।

Watch On

युवालाई स्वदेशमै अवसर खोज्न आग्रह गरेर मात्रै नपुग्ने भन्दै उनले नेपालभित्रको रोजगारी मर्यादित, सुरक्षित र सम्मानजनक बनाउनुपर्नेमा जोड दिए । बदलिँदो श्रम बजारको माग र श्रमिकको आकांक्षा सम्बोधन गर्न मन्त्रालयले पहिलोपटक नयाँ श्रम नीति निर्माण गरिरहेको र श्रम ऐन संशोधनको प्रक्रिया अघि बढाएको उनले जानकारी दिए ।

‘हामीले यो वर्षलाई रोजगार प्रवर्द्धन दशक घोषणा गरेका छौँ,’ मन्त्री यादवले भने, ‘यसमार्फत स्वदेशमै पर्याप्त रोजगारीका अवसर सिर्जना गरी युवा जनशक्तिलाई राष्ट्र निर्माणमा जोड्ने हाम्रो मुख्य लक्ष्य रहेको छ ।’

रोजगारीको ‘इकोसिस्टम’ निर्माणका लागि सरकारी, निजी क्षेत्र तथा विकास साझेदारसँगको संवाद र सहकार्यलाई थप सुदृढ बनाइरहेको उनले बताए ।

मन्त्री यादवका अनुसार कृषि, पर्यटन, हरित रोजगारी र केयर सेवासहितका क्षेत्रमा रोजगारी प्रवर्द्धन गर्ने कार्यक्रमको तयारी भइरहेको छ । रोजगारीका अवसर, आवश्यक योग्यता, सीप र श्रम बजारको मागलाई एकीकृत गरी रोजगारदाता र रोजगारी खोज्ने व्यक्तिबीच समन्वय गराउन ‘श्रम संसार’ प्रणालीलाई समेत परिमार्जन तथा स्तरोन्नति गरिएको उनले जानकारी दिए ।

नीति तथा कार्यक्रमको वास्तविक मूल्यांकन कार्यान्वयनको तहमा हुने भन्दै मन्त्री यादवले श्रमिकको दैनिक जीवनमा सकारात्मक प्रभाव नदेखिएसम्म परिवर्तनको अर्थ नहुने बताए ।

श्रम क्षेत्रको व्यवस्थापन तथा नियमनका लागि मन्त्रालयले ‘क्यारोट एन्ड स्टिक’ नीति अवलम्बन गर्ने उनले स्पष्ट पारे । कानुन पालना नगर्ने प्रतिष्ठानलाई कानुनी दायरामा ल्याउने र जिम्मेवार रोजगारदातालाई पहिचान गरी सम्मान तथा प्रोत्साहन गर्ने संस्कृति विकास गर्नुपर्ने उनको भनाइ छ ।

रोजगारदाता जिम्मेवार नहुने र श्रम कानुनको प्रभावकारी पालना नहुने हो भने युवाले स्वदेशमै आफ्नो भविष्य देख्ने आधार कमजोर हुने उनले बताए ।

श्रम तथा रोजगार कार्यालयहरू श्रमिक र प्रतिष्ठानसँग प्रत्यक्ष सम्पर्कमा रहने भएकाले तिनको भूमिका महत्त्वपूर्ण रहेको भन्दै मन्त्री यादवले कानुनबारे जानकारी गराउने, पालना गर्न सहजीकरण गर्ने र कमजोरी सुधार गराउने कार्यलाई प्राथमिकता दिन निर्देशन दिए ।

मन्त्री यादवले गत आर्थिक वर्षको कार्यप्रगति प्रस्तुत गर्दै एक वर्षमा ३ हजार ८३० वटा प्रतिष्ठान, ३ हजार ६३५ वटा बालश्रमसम्बन्धी निरीक्षण तथा २२० वटा श्रमिक आपूर्तिकर्ता कम्पनीको निरीक्षण सम्पन्न भएको जानकारी दिए ।

उनका अनुसार सो अवधिमा ७६१ वटा श्रम विवादसमेत समाधान गरिएको छ । आगामी दिनमा निरीक्षण, नियमन र श्रम विवाद समाधानको कामलाई थप तीव्रता दिन उनले निर्देशन दिएका छन् ।