हेटौँडा कपडा उद्योग सञ्चालनसँगै कपास खेतीमा जोड, निजी क्षेत्रलाई लगानी गर्न उद्योगमन्त्रीको आह्वान

काठमाडौं । हेटौँडा कपडा उद्योग सञ्चालनमा ल्याउने तयारीसँगै सरकारले उद्योगका लागि आवश्यक कपास स्वदेशमै उत्पादन गर्ने योजना अघि सारेको छ । उद्योगमन्त्री गौरीकुमारी यादवले कपास खेतीमा निजी क्षेत्र र व्यवसायीलाई लगानी गर्न आह्वान गरेकी छन् ।

नेपालमा कपडा उद्योगका लागि आवश्यक कच्चा पदार्थ ठूलो मात्रामा आयात गर्नुपर्ने अवस्था अन्त्य गर्दै स्वदेशमै कपास उत्पादन बढाउने उद्देश्यले व्यवसायीलाई खेतीमा लगानी गर्न आग्रह गरिएको हो ।

Watch On

मन्त्री यादवले कृषि मन्त्री गीता चौधरीसँग भेट गरी नेपालमा कपास खेती विस्तारका विषयमा छलफलसमेत गरेकी छन् । छलफलका क्रममा कृषि मन्त्री चौधरीले दाङ, बाँके र बर्दियालगायत जिल्लामा कपास खेतीका लागि उपयुक्त वातावरण रहेको बताएकी छन् ।

नेपालमा कपास खेतीको सम्भावना भए पनि व्यावसायिक रूपमा ठूलो क्षेत्रफलमा खेती हुन नसक्दा कपडा उद्योगका लागि आवश्यक कच्चा पदार्थ आयातमा निर्भर हुनुपरेको छ । कपास उत्पादन विस्तार गर्न सके आयात प्रतिस्थापनसँगै किसानको आम्दानी र रोजगारी बढाउन सकिने सरकारको अपेक्षा छ ।

यसैबीच लामो समयदेखि बन्द रहेको बुटवल धागो कारखाना पुनः सञ्चालन गर्ने प्रक्रिया पनि अघि बढेको उद्योग विभागका महानिर्देशक जितेन्द्र बस्नेतले बताएका छन् । उनका अनुसार कारखाना सञ्चालनका लागि आवश्यक सम्पत्ति तथा दायित्व मूल्यांकनको काम अन्तिम चरणमा पुगेको छ ।

हेटौँडा कपडा उद्योगका लागि आवश्यक कपास स्वदेशमै उत्पादन गर्ने र बुटवल धागो कारखानालाई समेत सञ्चालनमा ल्याउने तयारीले नेपालमा कपासदेखि धागो हुँदै कपडासम्मको उत्पादन शृंखला निर्माण गर्ने आधार तयार हुने देखिएको छ ।

मन्त्री यादवले स्वदेशी उद्योगलाई आवश्यक पर्ने कच्चा पदार्थ नेपालमै उत्पादन गर्न निजी क्षेत्रलाई प्रोत्साहन गर्ने बताउँदै आएकी छन् । कपास खेती विस्तारमार्फत विदेशी कपासको आयात घटाउने, स्वदेशी उत्पादन बढाउने र रोजगारी सिर्जना गर्ने सरकारको लक्ष्य रहेको छ ।