देउवा समूहको राष्ट्रिय भेलाः विमलेन्द्र निधि, रमेश लेखक र प्रकाशशरण महतद्वारा प्रतिवेदन पेश

काठमाडौँ । नेपाली कांग्रेसको संस्थापनइतर समूहको राष्ट्रिय भेलामा  बिभिन्न प्रतिवेदनहरु पेश भएका छन् । 

काठमाडौँको सुकेधारास्थीत एक पार्टी प्यालेशमा जारी राष्ट्रिय भेला अन्तर्गतको बन्दसत्रमा विधान संशोधन लगाएतका बिभिन्न प्रस्ताव छलफलका लागि पेश गरिएको हो । बैठकमा कांग्रेसका नेता विमलेन्द्र निधिले राजनीतिक प्रतिवेदन प्रस्तुत गरेका छन् । उनको प्रतिवेदनमा पुस्तान्तरणका नाममा आन्दोलनका हरेक चरणमा योगदान गर्नेहरूलाई विधि विपरीत अपमानीत गर्ने कार्य भएको उल्लेख गरिएको छ ।

Watch On

साथै १५ औँ महाधिवेशनका लागि निर्धारित समयभित्रै क्रियाशील सदस्यता नवीकरण गरिसकेका सदस्यहरूलाई पनि अद्यावधिक गर्न दवाव दिनु अनुचित रहेको उहाको प्रतिवेदनमा उल्लेख छ ।

त्यस्तै कांग्रेसका नेता रमेश लेखकले विधान संशोधनका लागि अवधारणा पत्र पेश गर्दै सामान्यतया एक व्यक्ति एकपटकमा एकपदमा मात्र जिम्मेवारीमा रहनसक्ने गरी आवश्यक व्यवस्था गर्ने उल्लेख छ ।

केन्द्रीय महाधिवेशनको समयावधि समाप्त हुन भन्दा कम्तीमा ६ महिनाभन्दा कम अवधि बाँकी रहेको अवस्थामा, राष्ट्रिय निर्वाचन हुनुभन्दा कम्तीमा ६ महिना वा सो भन्दा कम अवधि बाँकी रहेको अवस्थामा तथा पार्टीले केन्द्रीय महाधिवेशनको कार्यतालिका प्रकाशित गर्ने निर्णय गरिसकेको अवस्थामा विशेष महाधिवेशन गरिने छैन भन्ने व्यवस्था गर्ने समेत उहाको प्रस्ताव छ ।

साथै बैठकमा कांग्रेसका नेता डा. प्रकाशशरण महतले नेपाली कांग्रेसको आर्थिक सामाजिक नीतिको कार्यदिशा र एनपी साउदले समसामयिक प्रस्ताव प्रस्तुत गरेका छन् । बन्दसत्रमा प्रस्तुत भएका प्रतिवेदनमाथि छलफल भइ आइतबार आवश्यक निर्णयसहित पारित हुने कांग्रेस नेता मोहन बस्नेतले जानकारी दिए । 

उनले कांग्रेसको विधान अनुसार विशेष महाधिवेशन बोलाउने प्रक्रियामा त्रुटि रहेको बताए । विधानअनुसार केन्द्रीय कार्यसमितिको निर्णय बिना, सभापति वा महामन्त्रीहरूले मात्र चाहेर विशेष महाधिवेशन बोलाउन वा प्रस्ताव पास गर्न नसकिने उनको तर्क छ ।