भारतीय सेना प्रमुख किन आउँदैछन् नेपाल ?

काठमाडौं । भारतीय सेनाका प्रमुख धिरज सेठ चारदिने नेपाल भ्रमणका लागि आइतबार (आज) अपराह्न काठमाडौं आउँदै छन् ।

प्रधानसेनापति अशोकराज सिग्देलको औपचारिक निमन्त्रणामा भारतीय सेना प्रमुख सेठ नेपाल आउन लागेका हुन् ।

Watch On

‘भारतीय सेना प्रमुख आज (आइतबार) काठमाडौं आउँदै हुनुहुन्छ,’ नेपाली सेनाका प्रवक्ता सहायक रथी राजाराम बस्नेतले जानकारी दिए ।

सैनिक प्रवक्ता बस्नेतका अनुसार भारतीय सेना प्रमुखको नेपाल भ्रमणका दुई मुख्य उद्देश्य छन् । पहिलो, नेपाली सेनाको मानार्थ महारथीको दर्ज्यानी चिह्न ग्रहण गर्नु र दोस्रो, नेपाल–भारतबीचको सैन्य सम्बन्धलाई थप प्रगाढ बनाउनु हो ।

भ्रमणका क्रममा सोमबार राष्ट्रपति कार्यालय शीतल निवासमा विशेष समारोह आयोजना हुनेछ । उक्त समारोहमा राष्ट्रपति रामचन्द्र पौडेलले भारतीय सेना प्रमुख सेठलाई नेपाली सेनाको मानार्थ महारथीको दर्ज्यानी चिह्न प्रदान गर्नेछन् ।

नेपाल र भारतबीच एकअर्काका सेना प्रमुखलाई मानार्थ महारथीको दर्जा प्रदान गर्ने परम्परा रहँदै आएको छ ।

सोमबार नै जंगी अड्डामा प्रधानसेनापति सिग्देल र भारतीय सेना प्रमुख सेठबीच द्विपक्षीय भेटवार्ता हुनेछ । भेटवार्तामा दुई देशबीचको सैन्य सम्बन्ध तथा आपसी सहयोगका विषयमा छलफल हुने बताइएको छ ।

भारतीय सेना प्रमुख सेठको बुधबार स्वदेश फर्किने कार्यक्रम रहेको नेपाली सेनाले जनाएको छ ।