मन्त्री हुँदा गरेको वाचा पूरा गरिन् प्रतिभा रावलले, ओली, देउवा र प्रचण्डले १० वर्षसम्म नसकेको काम फत्ते

काठमाडौँ । १३ चैतमा सामान्य प्रशासन मन्त्रालयको कार्यभार सम्हाल्दै गर्दा मन्त्री प्रतिभा रावलले स्थानीय तहमा प्रमुख प्रशासकीय अधिकृतको समस्या अन्त्य गर्ने वाचा गरेकी थिइन् । उनको पहिलो प्राथमिकता नै पालिकामा देखिएको प्रमुख प्रशासकीय अधिकृत खटनपटनको समस्या हल गर्ने थियो । आज मन्त्री बनेको चार महिनामा रावलले यो समस्या समाधान गरेर आफ्नो वाचा पूरा गरेकी छिन् । 

मन्त्री रावलको नेतृत्वमा भूमि व्यवस्था, सहकारी, संघीय मामिला तथा सामान्य प्रशासन मन्त्रालयले करिब १० वर्षमा पहिलोपटक स्थानीय तहमा दरबन्दीबमोजिम प्रमुख प्रशासकीय खटाएर रिक्तताको लामो गतिरोधलाई अन्त्य गरेको हो । स्थानीय तहमा दरबन्दीबमोजिम पूर्ण रूपमा प्रमुख प्रशासकीय खटाइएको यो पहिलोपटक हो ।

Watch On

०७४ मा स्थानीय तहको निर्वाचन भएयता सरकारले सबै स्थानीय तहमा पूर्ण रूपमा प्रमुख प्रशासकीय अधिकृत खटाउन सकेको थिएन । कुनै न कुनै बहाना र कारणले स्थानीय तहहरूमा कर्मचारी अभाव हुने गरेको थियो ।

कर्मचारी नेतृत्व रिक्त हुँदा स्थानीय तहमा विकास निर्माणदेखि सेवाप्रवाह प्रभावित हुँदै आएको थियो । कर्मचारी स्थानीय तह जान नमान्ने र सरकारले पनि खटाउन बाध्य पार्न सकेको थिएन । प्रमुख प्रशासकीय नपठाएर निमित्तका भरमा स्थानीय तह चलाउने धन्दा नै चलाइएको थियो । त्यसले सेवाप्रवाहमा असर परेको थियो भने स्थानीय तहको प्रशासन चुस्त हुन सकेको थिएन । 

०७४ यता १० वर्षमा एमालेका केपी ओली, कांग्रेसका शेरबहादुर देउवा र माओवादीका प्रचण्डले पालैपालो सरकार चलाए पनि पालिकाको प्रशासनमा सुशासन कायम गर्न सकेका थिएनन् । पालिकामा कर्मचारी खटनमा मनपरी नै थियो । अति राजनीतिकरण हुँदा धेरै पालिका प्रमुख प्रशासकीय अधिकृत विहीन हुने गरेका थिए । यो अवस्था बालेन सरकारमा उत्कृष्ट पर्फमेन्स देखाइरहेकी मन्त्री रावलले अन्त्य गरेर सुशासनको अनुभूति गराएकी छिन् । 

सामान्य प्रशासन मन्त्रालयले सोमबारमात्रै विभिन्न मन्त्रालय र निकायमा कार्यरत कर्मचारीलाई स्थानीय तहमा सरुवा तथा कामकाजमा खटाउने निर्णय गरेको छ । मन्त्रालयको निर्णयबाट ४२ स्थानीय तहमा प्रमुख प्रशासकीय खटाइएको छ । तीमध्ये २० जनालाई नगरपालिकामा र २२ लाई गाउँपालिकामा खटाइएको हो । नगरपालिकामा उपसचिव र गाउँपालिकामा शाखा अधिकृतको दरबन्दी हुन्छ । तीनजनालाई भने स्थानीय तहबाट संघमा सरुवा गरिएको छ । स्थानीय तहमा जान नमानेका, मुद्दाका कारण अन्तरिम आदेश भएका, मुद्दा लागेर निलम्बनमा रहेकाहरूका समस्या सुल्झाएर कर्मचारी खटाइएको छ । 

योसँगै ७५३ वटै स्थानीय तहमा प्रमुख प्रशासकीय अधिकृत खटाइएको मन्त्रालयको संघीय तथा प्रादेशिक कर्मचारी प्रशासन शाखाका शाखा अधिकृत सञ्जीव नेपालले बताए । उनकाअनुसार स्थानीय तहका दरबन्दीबमोजिम प्रमुख प्रशासकीय अधिकृत पूर्ण भएका छन् । स्थानीय तहमा दरबन्दीबमोजिम प्रमुख प्रशासकीय अधिकृत पूर्ण भएको पहिलो हो ।