प्रधानमन्त्रीले माने सभामुखको रुलिङ, दुई भिभीआईपीबीच यस्तो भयो सल्लाह

काठमाडौँ । प्रधानमन्त्री वालेन्द्र शाहले सदनबाट आएको रुलिङ स्वीकार गरेका छन् । 

सभामुख डोलप्रसाद अर्यालले सोमबारको प्रतिनिधि सभा बैठकबाट सांसदले उठाएका प्रश्नको जवाफ दिन पहिलोपटक प्रधानमन्त्री शाहकै नाममा रुलिङ गरेका थिए । 'माननीय सदस्यहरूले लामो समयदेखि प्रतिनिधिसभा नियमावली नियम, ५६ बमोजिम प्रधानमन्त्री वा प्रधानमन्त्रीको कार्यक्षेत्रसँग सम्बन्धित महत्वपूर्ण विषय प्रश्नोत्तरको माग गर्दै गरिरहनुभएको विरोधप्रति मेरो ध्यानाकर्षण भएकै छ । यसै सन्दर्भमा प्रतिनिधिसभाको बैठकमा उपस्थित भई नियमावलीको नियम ५६, ५७, ५८, ५९ र ६० बमोजिम माननीय सदस्यहरूको प्रश्नको जवाफ दिन म सम्माननीय प्रधानमन्त्रीलाई निर्देश गर्दछु ।’

Watch On

सभामुखले प्रधानमन्त्री शाहलाई दुइटा रुलिङ गरेका थिए । पहिलो सांसदहरुले उठाएको प्रधानमन्त्री कार्यालय र प्रधानमन्त्रीले सम्हालिरहेको रक्षा मन्त्रालयसँग सम्बन्धित प्रश्नको जवाफ दिने । दोस्रो प्रतिनिधि सभा नियमावलीअनुसारको प्रत्येक महिनाको पहिलो हप्ता सञ्चालन हुने प्रधानमन्त्रीसँग प्रत्यक्ष प्रश्नोत्तरमा सहभागी हुने । 

प्रधानमन्त्री शाहले दुबै रुलिङ मानेको संसद सचिवालयका अधिकारीले बताएका छन् । उनीहरुका अनुसार सभामुखको रुलिङ प्रधानमन्त्री शाहले मानेका छन् ।

सभामुख र प्रधानमन्त्रीबीच सल्लाह भएर प्रधानमन्त्रीले जवाफ दिने दिन तोकिएको संसद सचिवालयका एक पदाधिकारीले बताए । 'सभामुखज्यूले सुरुमा रुलिङ गर्नुभयो । रुलिङमा उठेका जवाफ र नियमावलीको नियम ५६ को प्रत्यक्ष प्रश्नोत्तरको कुरा थियो । लगत्तै प्रधानमन्त्री कार्यालयसँग परामर्श गरी जवाफ दिने दिन तोकिएको हो । प्रधानमन्त्रीले भदौ १० गते भ्याउँछु भनेपछि सोही बमोजिम सभामुखज्यूले सभामा जानकारी गराउनुभयो,' ती पदाधिकारीले भने । 

सोमबारको प्रतिनिधि सभा बैठकको अन्तिममा सभामुख अर्यालले नियमावलीको परिच्छेद ९ बमोजिम प्रधानमन्त्रीसँग प्रत्यक्ष प्रश्नोत्तरसम्बन्धी कार्यक्रम १० भदौको बैठकमा हुने गरी निर्धारण गरेको जानकारी गराएका हुन् । यसका लागि ५ भदौको १ बजेसम्म प्रश्न दिन सभामुखले आग्रह गरेका छन् ।

दुबै भिभिआईपीबीच समझदारीमै जवाफ दिने मिति तोकिएपछि संसदले अब गति लिने विश्वास गरिएको छ ।