कांग्रेस १५औं महाधिवेशनको संशोधित कार्यतालिका सार्वजनिक, भदौ २४ देखि वडा अधिवेशन

काठमाडौँ। नेपाली कांग्रेसले १५औँ केन्द्रीय महाधिवेशनका लागि संशोधित निर्वाचन कार्यतालिका सार्वजनिक गरेको छ । संशोधित तालिकाअनुसार केन्द्रीय महाधिवेशन आगामी २०८३ असोज १६ देखि १९ गतेसम्म काठमाडौंमा हुनेछ ।

कांग्रेस केन्द्रीय निर्वाचन समितिको बुधबार बसेको बैठकले वडा तहदेखि केन्द्रीय तहसम्मका अधिवेशनको नयाँ मिति तय गरेको हो । ललितपुरस्थित बीपी स्मृति भवनमा बसेको बैठकले सबै तहको निर्वाचन प्रक्रिया टुंग्याएर असोजमा केन्द्रीय महाधिवेशन गर्ने गरी कार्यतालिका अघि सारेको हो ।

Watch On

नयाँ तालिकाअनुसार देशभरका ६ हजार ७४३ वडामा भदौ २४ गते अधिवेशन हुनेछ । त्यसपछि भदौ २७ गते गाउँ तथा नगरपालिका अधिवेशन, भदौ ३१ गते प्रदेश सभा क्षेत्रीय अधिवेशन र असोज ३ गते प्रतिनिधिसभा क्षेत्रीय अधिवेशन हुनेछ ।

एक मात्र प्रतिनिधिसभा निर्वाचन क्षेत्र भएका जिल्लाको अधिवेशन पनि असोज ३ गते नै गर्ने तय भएको छ । जिल्ला अधिवेशन असोज ७ गते र प्रदेश अधिवेशन असोज १० गते हुनेछ । 

यी सबै तहको अधिवेशन सम्पन्न भएपछि असोज १६ देखि १९ गतेसम्म काठमाडौंमा केन्द्रीय महाधिवेशन आयोजना हुनेछ । निर्वाचन समितिले अधिवेशनको तयारीसँगै निर्वाचन प्रतिनिधि र अधिकृतलाई प्रशिक्षण दिने कार्यतालिका पनि सार्वजनिक गरेको छ । निर्वाचन प्रतिनिधिलाई भदौ २ देखि १० गतेसम्म अभिमुखीकरण तालिम दिइनेछ ।

भदौ ११ गते निर्वाचन अधिकृतलाई सम्बन्धित जिल्लामा खटाइनेछ भने भदौ १५ गते वडामा निर्वाचन प्रतिनिधि पठाइनेछ । वडा तहमा भदौ १६ देखि २० गतेसम्म अभिमुखीकरण कार्यक्रम सञ्चालन गरिने निर्वाचन समितिले जनाएको छ ।

कांग्रेसले विदेशस्थित बाँकी रहेका जनसम्पर्क समितिका अधिवेशन पनि भदौ मसान्तभित्र सम्पन्न गरिसक्नुपर्ने जनाएको छ । निर्वाचन समितिका अनुसार अमेरिका, फ्रान्स, नेदरल्यान्ड्स, जापान, दक्षिण कोरियालगायत १५ देशमा जनसम्पर्क समितिको अधिवेशन यसअघि नै सम्पन्न भइसकेको छ ।

निर्वाचन समितिका संयोजक प्रेमबहादुर खड्काका अनुसार वर्षात्को मौसम र पार्टीभित्र चलेको आन्तरिक छलफलका कारण अघिल्लो कार्यतालिकामा केही परिमार्जन गर्नुपरेको हो ।

कांग्रेस केन्द्रीय कार्यसमितिले संविधान, प्रचलित कानुन र पार्टी विधानलाई आधार बनाएर केन्द्रीय महाधिवेशनको मिति तय गरेपछि निर्वाचन समितिले त्यसअनुसार तल्लो तहदेखि केन्द्रसम्मको निर्वाचन प्रक्रिया मिलाएको हो ।