विरामी परेका पूर्वाधार मन्त्रीको रास्वपाकै सांसदले आलोचना गरेकामा सभापति लामिछाने असन्तुष्ट

काठमाडौँ । राष्ट्रिय स्वतन्त्र पार्टीका सभापति रबि लामिछानेले विरामी भएर हेलिकप्टरबाट उद्धार गरिएका पूर्वाधारमन्त्री सुनिल लम्सालको आफ्नै पार्टीका सांसदले आलोचना गरेकामा असन्तुष्टि जनाएका छन् । 

बुधबार सांसद र मन्त्रीहरुसँगको छलफलमा सभापति लामिछानेले सदनमै रास्वपा सांसदले विरामी भएर उद्धार गरिएको मन्त्रीलाई आलोचना बनाएको विषयमा आपत्ति जनाएका हुन् । 

Watch On

उनले विरामी हुन कसैलाई रहन नहुने भन्दै न्युनतम संवेदनशीलता ख्याल गर्न निर्देशन दिएका थिए । 

सुदूरपश्चिम भ्रमणमा गएका मन्त्री लम्साललाई युरिन इन्फेक्सन भएपछि सेनाको हेलिकप्टरबाट उद्धार गरी काठमाडौँ ल्याइएको थियो । विपक्षीले जनतालाई राम्रो उपचार छैन, मन्त्रीलाई हेलिकप्टरबाट उद्धार गरेर प्रश्न उठाएका बेला सत्तारुढ सांसद पारसमणी गेलाल लगायत पनि यही आशयमा प्रश्न उठाएपछि सभापति लामिछानेले विरामी मन्त्रीप्रति सदभाव राखेका हुन् । 

'युरिन इन्फेक्सन खतरा हो । युरेनियम इन्फेक्सनमा मान्छे मर्छ । यो मलाई पनि भएको थियो । त्यसैले ब्लेम लाउने होइन,' सभापति लामिछानेले भने । 

लामिछानेले कोही रहरले विरामी नहुने पनि प्रष्ट्याए । 'उहाँ विरामी भएर गाह्रो भएर ल्याएको हो । यस्तो विषय कोट्याएर तुलना नगर्नुस् । विषय उठाउनुस् । तर मानवीय संवेदना पनि ख्याल गर्नुस्,' उनले भने ।