बालेन र कुमार बेनबारे खुलेरै बोले सभापति लामिछाने

काठमाडौँ । राष्ट्रिय स्वतन्त्र पार्टीका सभापति रवि लामिछानेले पार्टीका वरिष्ठ नेता एवं प्रधानमन्त्री वालेन्द्र शाह र प्रधानमन्त्रीका मुख्य सल्लाहकार कुमार व्यञ्जनकारबारे आफ्ना सांसद र मन्त्रीहरुसँग खुलेर बोलेका छन् । 

बुधबार संसदीय दलमा सांसदहरु र मन्त्रीहरुसँगको छलफलमा सभापति लामिछानेले प्रधानमन्त्री शाह र उनका सल्लाहकार बेनसँग सबै विषयमा कुराहरु हुने गरेको खुलाएका हुन् । 

Watch On

सभापति लामिछानेले आफूहरुबीच खुलस्त कुरा हुने भन्दै यताको कुरा उता लाउने र उताको कुरा यता लगाउने काम बन्द गर्न पनि निर्देशन दिए । 

'यो बालेन वा रवि पार्टी होइन । रास्वपा एउटा पार्टी हो । काम गर्ने भए रास्वपा हुने हो । नभए छोड्ने हो,' उनले भने, 'हामी सबै एक हो । हामीमा त्यस्तो केही छैन । हामी कहिलेकाँही साझमा भेट्दा सँगै नाच्छौं ।'

सभापति लामिछानेले प्रधानमन्त्रीका मुख्य सल्लाहकार बेनले सबै कुरा शेयर गर्ने गरेको पनि सुनाउँदै कुरा नलगाउन सचेत गराए । 'तपाईहरुले कुमारलाई भने पनि कुमारले सुनाइहाल्छ । घरी कुमारतिर, घरी यतातिर नगर्नुस् । हामी एकै हो । देश बनाउने उद्देश्यमा सँगै हिँडिरहेका छौं । कसैले यो र त्यो नठान्नुहोला,' उनले भने । 

सरकार र पार्टीका हरेक गतिविधि र निर्णयमा प्रधानमन्त्री वा कुमार बेनसँग सल्लाह र समन्वय भइरहेको पनि सभापति लामिछानेले स्पष्ट पारेका थिए । उनले कहिले आफूलाई त कहिले प्रधानमन्त्रीका मुख्य सल्लाहकार कहाँ पुगेर चलखेल गरेकामा भने सांसदहरुसँग समग्रतामा असन्तुष्टि जनाएका थिए । 

छलफलपछि पनि सभापति लामिछानेले सञ्चारकर्मीसँग कुरा गर्दै सभापति लामिछानेले प्रधानमन्त्री शाहसँग आफ्नो सौहार्दपूर्ण सम्बन्ध रहेको स्पष्ट पारेका थिए । प्रधानमन्त्री शाहले ‘एक्लै लडिरहेको छु’ भन्दै लेखेको विषयलाई राजनीतिक असन्तुष्टिसँग जोड्न नहुने उनको भनाइ छ । ‘प्रधानमन्त्रीले एक्लै लडिरहेको छु भनेर लेख्नुभएको विषय हेर्दा उहाँ त एउटा पोइट पनि हो, कलाकार पनि हो । त्यसकारण हामीले सोचेजस्तो राजनीतिक अर्थ खोज्ने नै होइन,’ उनले भने, ‘यहाँ सरकारसँग सिंगो पार्टी उभिएको छ । उहाँ कसरी एक्लो हुनुहुन्छ ?’ 

सभापति लामिछानेले आफू र प्रधानमन्त्री जनताले दिएको म्यान्डेटमा स्पष्ट रहेको बताए । ‘हामी जनताले दिएको म्यान्डेटमा स्पष्ट छौँ । यो रविले बालेनलाई र बालेनले रविलाई गरेको वाचा होइन, इतिहास र देशसँग सँगै बसेर हामीले गरेको वाचा हो,’ उनले भने ।

सामान्य मतभेद वा व्यक्तिगत विषयलाई राजनीतिक सम्बन्धसँग जोड्न नहुने उनको भनाइ छ । ‘यस्ता सामान्य कुराले यत्रो राजनीतिक कमिटमेन्ट, ऐतिहासिक कमिटमेन्ट र सम्बन्ध बिग्रियो भन्ने हुँदैन । घरमा परिवारसँग जिस्केको वा साथीभाइसँग सानो कुरा नमिलेर सम्बन्ध बिग्रेको हो र ? यो चल्ने विषय पनि होइन, चलाउने विषय पनि होइन । संवेदनशील विषय हो र यसको संवेदनशीलता बुझ्दछौँ,’ उनले भने ।

चार महिना मात्रै सरकार सञ्चालनमा आएको उल्लेख गर्दै लामिछानेले रमाइलोका लागि जसले जे भने पनि आफूलाई आपत्ति नभए पनि सरकार र नेतृत्व गम्भीरतापूर्वक अघि बढिरहेको बताए । ‘वास्तविकतामा हामी एकदमै होसियारीपूर्वक, ध्यानपूर्वक, राजनीतिक सुझबुझका साथ देशको भविष्य र इतिहासलाई योगदान दिने हिसाबले काम गरिरहेका छौँ । अरू कुनै कुराको अर्थ र गुन्जायस बिल्कुलै छैन,’ उनले भने ।