पासपोर्ट प्रकरणमा प्रधानमन्त्री कार्यालयमा केरकार गरिएको विषयमा बोले अख्तियार प्रमुख राई, के भएको थियो ?

काठमाडौँ । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले ई-पासपोर्ट छपाई खरिद ठेक्का अनियमितता प्रकरणमा प्रधानमन्त्री कार्यालयबाट कुनै हस्तक्षेप नभएको प्रष्टीकरण दिएका छन् । 

पासपोर्ट प्रकरणमा स्वतन्त्र संवैधानिक आयोग अख्तियारका पदाधिकारीलाई प्रधानमन्त्री कार्यालयमा बोलाएर केरकार गरेको विषय के हो भनेर सांसदहरुले उठाएको जिज्ञासामा प्रमुख आयुक्त राईले यो सत्य नभएको जवाफ दिएका हुन् । 

Watch On

प्रमुख आयुक्त राईले अनुसन्धानको कुनै विषयमा प्रधानमन्त्रीले चासो राख्न पाउने पनि बताए । पासपोर्टमा पनि प्रधानमन्त्रीले चासो राखेको र आफूहरुले अनुसन्धान सकाएर अभियोजन गरेको उनको भनाइ थियो ।

'पासपोर्टको विषयवस्तुमा प्रधानमन्त्रीज्यूले बोलाउनु भएको हो । छलफल गर्न बोलाउन सकिन्छ । सुझाव लिन बोलाउन सकिन्छ । त्यो विषयमा के भएको भनेर, तपाईंले के गरिराख्नु भएको छ भनेर बोलाउन सकिन्छ । त्यसैले हामी गएर छलफल गर्यौ । त्यसपछि यसलाई अगाडि एक्सपेरिमेन्ट गर्न पाउनुहुन्थ्यो भनेर राखेपछि हामीले एक्सपेरिमेन्ट गर्यौ । हामीले मुद्दा पनि लग्यौं । अब मुद्दा दर्ता भइसकेको छ । त्यो अभियोजन भइसकेको छ । त्यो अभियोजनको तपाईहरुले पनि वेबसाइटमा पाइन्छ, हेर्न सक्नुहुन्छ । त्यो ठिक थियो कि थिएन भन्ने कुरो गर्दा वा कैफियत कति छ भन्ने कुरो त्यो अभियोजनको त्यो पत्र तपाईहरुले हेर्नुस स्पष्ट देख्नुहुन्छ । कैफियत बिना हामीले लगेको अवस्था छैन,' उनले भने ।