मन्त्री रावलको कार्यक्रममा अब फूलमाला, खादा र बुके निषेध, ९ बुँदे निर्देशिका जारी

भूमि व्यवस्था, सहकारी तथा संघीय मामिला तथा सामान्य प्रशासनमन्त्री प्रतिभा रावल सहभागी हुने सरकारी कार्यक्रमलाई सादगीपूर्ण, मितव्ययी र परिणाममुखी बनाउन मन्त्रालयले नौबुँदे विशेष निर्देशिका जारी गरेको छ।

निर्देशिकाले मन्त्री रावलको स्वागतमा फूलमाला, खादा, बुके, दोसल्लालगायतका सम्मान सामग्री प्रयोग गर्न रोक लगाएको छ । त्यस्तै, मन्त्रीलाई व्यक्तिगत उपहार, मायाको चिनो वा स्मृतिचिह्न प्रदान गर्नसमेत निषेध गरिएको छ ।

Watch On

मन्त्रालयका अनुसार अब मन्त्री सहभागी हुने कार्यक्रममा अनावश्यक सम्मान, अभिनन्दन तथा विशेष समारोह आयोजना गरिने छैन । स्वागत औपचारिक र संक्षिप्त बनाउन तथा कार्यक्रमसँग प्रत्यक्ष सम्बन्धित व्यक्ति र सरोकारवालालाई मात्र सहभागी गराउन निर्देशन दिइएको छ ।

निर्देशिकाले अनावश्यक भिआइपी जमघट र औपचारिक स्वागत टोलीको व्यवस्थासमेत नगर्न भनेको छ । कार्यक्रम निर्धारित समयमै सुरु र सम्पन्न गर्नुपर्ने तथा लामो स्वागत मन्तव्य र अनावश्यक भाषण हटाएर कार्यसूचीअनुसार कार्यक्रम सञ्चालन गर्नुपर्ने व्यवस्था गरिएको छ ।

त्यस्तै, कार्यक्रमको सजावट, ब्यानर, उपहार तथा अन्य औपचारिकतामा हुने खर्च कटौती गर्दै सम्भव भएसम्म सम्बन्धित कार्यालयको सभाहल र सार्वजनिक स्रोतसाधन प्रयोग गर्न निर्देशन दिइएको छ ।

सञ्चार तथा प्रचारप्रसारका लागि छुट्टै मिडिया निमन्त्रणा नगरी कार्यालयको आधिकारिक सञ्चार संयन्त्रमार्फत सूचना तथा समाचार सार्वजनिक गर्नुपर्ने निर्देशिकामा उल्लेख छ । 

प्रशासकीय फजुल खर्च नियन्त्रण गर्दै सरकारी कार्यक्रमलाई तडकभडकमुक्त, निर्णयमुखी र परिणाममुखी बनाउने उद्देश्यले निर्देशिका लागू गरिएको मन्त्रालयले जनाएको छ।