रास्वपाका केन्द्रीय सदस्यलाई आज कबिन्द्र र प्रमोदले प्रशिक्षण दिने, सभापति लामिछानेले सम्बोधन गर्ने

काठमाडौँ । राष्ट्रिय स्वतन्त्र पार्टीका केन्द्रीय सदस्यका लागि सञ्चालित दुईदिने प्रशिक्षण आज सम्पन्न हुँदैछ ।  

प्रशिक्षणलाई रास्वपाले ‘रास्वपा कार्यशाला–नीति, सङ्गठन र नेतृत्व, शृङ्खला–१’ नाम दिएको छ ।  प्रशिक्षणमा पार्टीको नीति, सङ्गठन सुदृढीकरण, नेतृत्व क्षमता विकासका बारेमा छलफल भइरहेको रास्वपाका सङ्गठन विभाग प्रमुख प्रमोद न्यौपानेले जानकारी दिए । 

Watch On

उनकाअनुसार दोस्रो दिन आइतबार निवर्तमान महामन्त्री कविन्द्र बुर्लाकोटीले पार्टीको सङ्गठनात्मक संरचना, त्यसको सुदृढीकरण र केन्द्रीय सदस्यहरूको भूमिकाबारे प्रशिक्षण दिँदैछन् । 
 
त्यसैगरी  सङ्गठन विभाग प्रमुख प्रमोद न्यौपानेले ‘मिडिया र सोसल मिडियाः कसरी प्रयोग गर्ने भनेर प्रशिक्षण दिनेछन् । 

यसैगरी किरण तिमिल्सिनाले राजनीतिज्ञका रुपमा एआईकाे प्रयोग कसरी गर्ने भनेर प्रस्तुति दिनेछन् । 

सभापति रबि लामिछानेले समापनमा सम्बोधन गर्नेछन् भने सहभागीलाई प्रमाणपत्र हस्तान्तरण गर्नेछन् । 

प्रशिक्षणको पहिलो दिन ‘नेपालको चित्र, हामी कहाँ छौँ?’ शीर्षकमा अनिल चित्रकारले देशको वर्तमान र अवस्था तथा उपसभापति डा. स्वर्णिम वाग्लेले पार्टीको प्रस्तावना, सामाजिक लोकतन्त्र र त्यसका आधारबारे प्रस्तुति दिएका थिए ।

महामन्त्री विपिनकुमार आचार्यले पार्टीका आधारभूत मूल्य–मान्यता तथा स्थानीय निर्वाचनका लागि उम्मेदवार छनोटको रूपरेखा, पूर्वसचिव सुरेन्द्र अर्यालले बजेट निर्माणको वैज्ञानिक प्रक्रिया तथा उपसभापति सोविता गौतमले पार्टी र सरकारबीचको अन्तरसम्बन्ध, समस्या र समाधानका उपायबारे प्रस्तुति दिएका थिए ।