गरिमा चौधरीको घटनामा गृहमन्त्रीले  देखाएको दायित्वबोधले  'राज्य छ है' भन्ने अनुभूति दिलाएको छ : सचेतक धिताल

काठमाडौँ । राष्ट्रिय स्वतन्त्र पार्टीकी सचेतक क्रान्तिशिखा धितालले बाराको जितपुर सिमराकी  तीन वर्षीया बालिका गरिमा चौधरीमाथि भएको जघन्य अपराधको घटनामा गृहमन्त्री सुधन गुरुङले देखाएको दायित्वबोधको प्रशंसा गरेकी छिन् । 

यो घटनाले समाज नै आक्रोशित र विभाजित भइरहेका बेला गृहमन्त्री गुरुङले राज्य छ है भनेर अनुभूति दिलाएको भनाइ धितालको छ । 'यो घटनाले हरेक संवेदनशील मन स्तब्ध  र आक्रोशित बनेको छ । एउटा अबोध बालिकामाथि भएको यस्तो अपराधले परिवारलाई मात्रै होइन, सिंगो समाजको विवेकलाई प्रश्न गरिरहेको हुन्छ,' उनले फेसबुकमा लेखेकी छिन् । 

Watch On

नीति निर्माण गर्ने स्थानमा हुँदाहुँदै पनि यो घटनापछि धेरै दिनसम्म आफूलाई असहाय महसुस गरेको उनले उल्लेख गरेकी छिन् ।  खासमा यस्तो पीडा शब्दले व्यक्त गर्न पनि नसकिने उनको धारणा छ ।

'यस कठिन घडीमा गृहमन्त्रीज्यूले देखाउनुभएको दायित्वबोध, संवेदनशीलता र तदारुकताले मनलाई केही हलुका बनाएको छ । पीडित परिवारलाई ‘राज्य छ है, तपाईंहरू एक्लै हुनुहुन्न’ भन्ने अनुभूति दिलाउनु भएकोमा हृदयदेखि धन्यवाद,' उनले लेखेकी छिन् । 

सचेतक धितालले अब यो घटना एउटा समाचार बनेर हराउन नहुनेमा जोड दिएकी छिन् । कानुनी सुधार र सामाजिक चेतका लागि यो घटना रेकर्डमा रहनुपर्ने उनको भनाइ छ ।  'यो हाम्रो नीति, हाम्रो प्रणाली र हाम्रो सामूहिक चेतनामा निरन्तर झकझक्याइरहने  स्थायी प्रश्न बनेर रहनुपर्छ,' उनले भनेकी छिन् ।