लालपुर्जा वितरणलाई स्थानीय तहले प्राथमिकता दिनुपर्छ : मन्त्री रावल

काठमाडौँ। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिसम्बन्धी समस्या समाधानलाई स्थानीय तहले प्राथमिकता दिनुपर्ने बताएकी छन् ।

सुदूरपश्चिम भ्रमणमा रहेकी मन्त्री रावलले स्थानीय तहका जनप्रतिनिधि तथा सम्बन्धित निकायसँग भूमिसम्बन्धी समस्या समाधानको अवस्थाबारे जानकारी लिँदै भूमिहीन दलित, भूमिहीन सुकुम्बासी र अव्यवस्थित बसोबासीलाई लालपुर्जा वितरण गर्ने कामलाई तीव्रता दिन आग्रह गरेकी हुन् ।

Watch On

मन्त्री रावलले कैलालीको धनगढी उपमहानगरपालिका, कैलारी गाँउपालिका, भजनी नगरपालिका, टीकापुर नगरपालिका, लम्कीचुहा नगरपालिका, बदगोरिया नगरपालिका, घोडाघोडी नगरपालिका, गौरीगंगा नगरपालिका लगायतका स्थायीय तहमा पुगेर नापजाँच तथा लालपुर्जा वितरणको काम तीव्र गतिमा अघि बढाउन जनप्रतिनिधि तथा सम्बन्धित निकायका पदाधिकारीसँग छलफल गरिन्।

मन्त्री रावलले पालिका–पालिकामा पुगेर भूमिहीन सुकुम्बासीसँग प्रत्यक्ष भेटघाट तथा अन्तरक्रिया गरिरहेकी छन्। कन्चनपुरको दोधारा–चाँदनी, भीमदत्त, बेदकोट, शुक्लाफाँटा र कृष्णपुरलगायतका पालिकामा पुगेर उनले भूमिहीन नागरिकका समस्या, उनीहरूले भोगिरहेका कानुनी तथा प्रक्रियागत जटिलता र लालपुर्जा प्राप्तिको अवस्थाबारे जानकारी लिएकी हुन्।

भेटघाटका क्रममा मन्त्री रावलले भूमिहीन सुकुम्बासीलाई सरकारले लालपुर्जा दिने बाटो खुलिसकेको र आवश्यक कानुनी सुधारसमेत अघि बढाइएको बताउँदै नआत्तिन र अफवाहमा नलाग्न आग्रह गरेकी छन्। वास्तविक भूमिहीन दलित, भूमिहीन सुकुम्बासी तथा अव्यवस्थित बसोबासी छुट्न नहुने भन्दै उनले स्थानीय तह र सम्बन्धित निकायलाई प्रभावकारी ढङ्गले काम गर्न निर्देशन समेत दिएकी छन्।

मन्त्री रावलले सहकारी पीडितका गुनासो पनि प्रत्यक्ष रूपमा सुनिरहेकी छन्। सहकारीमा बचत गरेको रकम फिर्ता नपाएका पीडितको समस्या समाधान र बचत फिर्ताको प्रक्रियालाई सरकारले प्राथमिकताका साथ अघि बढाइरहेको उनले बताइन्। कैलालीमा सहकारी पीडितको रकम फिर्ता गर्ने काम सुरु भइसकेको जानकारीसमेत उनले दिएकी छन्।

त्यस्तै, मन्त्री रावलले कञ्चनपुरका आरक्षपीडितहरुसँग पनि प्रत्यक्ष भेटघाट गरेकी छन्। भेटघाटका क्रममा लामो समयदेखि समाधान हुन नसकेको आरक्षपीडितको समस्या पनि सरकारको प्राथमिकतामा रहेको मन्त्री रावलले बताइन्।

मन्त्री रावलले भूमिसम्बन्धी समस्या समाधानमा सङ्घ, प्रदेश र स्थानीय तहबीच प्रभावकारी समन्वय आवश्यक रहेको बताइन् । एउटा तहको असहयोगका कारण पुरै पालिकामा लालपुर्जा वितरणको काम प्रभावित हुन सक्ने भन्दै उनले सबै तहका सरकारलाई नागरिकको समस्या समाधानका लागि साझा रूपमा अघि बढ्न आग्रह गरिन् ।

मन्त्री रावलको भ्रमणका क्रममा स्थानीय नागरिकसँग प्रत्यक्ष संवाद, समस्या सुन्ने, स्थलगत अवस्थाको जानकारी लिने र सम्बन्धित निकायलाई कामको गति बढाउन निर्देशन दिने क्रम चलिरहेको छ। मन्त्री रावल औपचारिक बैठकभन्दा नागरिककै बीचमा पुगेर प्रत्यक्ष संवाद गरिरहेकी छन् ।