काठमाडौं । सरकारले भिजिट भिसासम्बन्धी ६ बुँदे नयाँ कार्यविधि जारी गरेको छ । गृहमन्त्रालयले पुरानो १७ बुँदे कार्यविधि खारेज गर्दै जारी गरेको कार्यविधि भोली(बुधबार)देखि लागू हुनेछ । यसअघिको कार्यविधिले नक्कली कागजात बनाउने गिरोहको चलखेल बढेको भन्दै गृहले नयाँ कार्यविधि बनाएको हो । 

नयाँ कार्यविधि अनुसार अब राहदानी, भिसा, टिकट, होटल बुकिङ वा आफन्तले स्पोन्सर गरेको कागजात, पाँच सय डलर र फर्किने स्वघोषणा भए भिजिट भिसामा जान सकिने छ । 

नयाँ कार्यविधि अनुसार भिजिट तथा पर्यटक भिसामा विदेश यात्रा गर्दा निम्न कागजताहरु आवश्यक पर्ने छन् ।

१) कम्तीमा ६ महिनाको वैध अवधि भएको राहदानी 

२) सम्बन्धित देशको प्रवेषाज्ञा(VISA) वा अनअराइभल(On arrival visa) भिसा प्राप्त हुने मुलुक भए प्रवेषाज्ञा नचाहिने । 

३) दुईतर्फी हवाई टिकट

४) भ्रमण अवधिभर होटल बुकिङ नभई आफन्तसँग रहने भएमा एकाघरका तीन पुस्ता भित्रको नाता खुल्ने नागरिकता प्रमाणपत्र वा अन्य कुनै प्रमाणपत्र ।

५) भ्रमणको सम्पूर्ण खर्च व्यहोर्ने सरकारी तथा गैरसरकारी संस्थाको निमन्त्रणा पत्र वा सो नभएमा कम्तीमा ५०० अमेरिकी डलर बराबरको नगद सटही भएको प्रमाण(नगद वा डेविट,क्रेडिट कार्ड)

६) संयुक्त अरब ईमिरेटस्, बहराईन, कुवेत, कतार, ओमन र साउदी अरेवियामा भिजिट भिसामा भ्रमण गर्दा अनुसूची २ बमोजिम स्वःघोषणा गर्नु पर्नेछ । स्वःघोषणामा संलग्न विवरणको प्रमाणको भार(Burden of proof) सम्बन्धित व्यक्तिमा रहने छ ।