राष्ट्रपतिले भने– भोटेकोशी बाढीपीडितको व्यवस्थापन र पुनर्निर्माण तीव्र पार्नू

काठमाडौं । राष्ट्रपति रामचन्द्र पौडेलले भोटेकोशी बाढी प्रभावितहरूको तत्काल व्यवस्थापन, सडक तथा यातायात सञ्चालन, पुनर्निर्माण र पुनःस्थापनाका कामलाई तीव्रता दिन सरकारको ध्यानाकर्षण गराएका छन्।

Watch On

राष्ट्रपति पौडेलले भौगोलिक विकटतालाई ध्यानमा राखी सडक यातायात सञ्चालनमा सरकारको क्षमता नपुगे ठूला बेलिब्रिजसहितका पूर्वाधार निर्माणका लागि अन्तर्राष्ट्रिय समुदायको सहयोग लिन सुझाव दिएका छन्।

जलवायु परिवर्तनका कारण नेपालले व्यहोर्नुपरेको क्षतिको क्षतिपूर्ति प्राप्त हुने गरी प्रधानमन्त्रीले अन्तर्राष्ट्रिय समुदायसमक्ष आवाज उठाउनुपर्ने सुझाव पनि उनले दिएका छन्।

राष्ट्रपति पौडेलले परराष्ट्रमन्त्री शिशिर खनाल र पूर्वाधार विकासमन्त्री सुनील लम्सालसँग बुधबार राष्ट्रपति भवन शीतल निवासमा छुट्टाछुट्टै छलफल गरेका हुन्। छलफलमा सडक यातायात सञ्चालन तथा बाढीपीडितको बसोबासका लागि होल्डिङ सेन्टर व्यवस्थापनको कामलाई तीव्रता दिन उनले आग्रह गरेका छन्।

आफूले बाढी प्रभावित क्षेत्रको स्थलगत अवलोकनका क्रममा पीडितको अवस्था र बाढीबाट पुगेको क्षति देखेको उल्लेख गर्दै राष्ट्रपति पौडेलले बसोबास तथा क्षतिग्रस्त संरचनाको पुनर्निर्माणको कामलाई अल्पकालीन, मध्यकालीन र दीर्घकालीन सोचका साथ अघि बढाउनुपर्नेमा जोड दिएका छन्।

बाढी प्रभावित क्षेत्रको जनजीवन सहज र सरल बनाउन तत्कालका कामलाई प्राथमिकता दिन पनि उनले आग्रह गरेका छन्।

मन्त्री खनालसँगको भेटमा प्रतिनिधिसभा सदस्य अर्जुननरसिंह केसी र प्रधानसेनापति अशोकराज सिग्देल सहभागी थिए।

सो अवसरमा मन्त्रीद्वयले दसैँअघि नै सडक यातायात पूर्ववत् सञ्चालन गर्ने तथा बाढी प्रभावित नागरिकको बसोबासका लागि अस्थायी टहरा (क्याप्सुल होम) निर्माण सकिने गरी दिनरात काम भइरहेको जानकारी राष्ट्रपतिलाई गराएका थिए।

यस्तै, मन्त्रीहरूले वैकल्पिक सडक निर्माण कार्यलाई सरकारले तीव्रता दिएको, लामो बेलीब्रिजका लागि मित्रराष्ट्रहरूसँग आग्रह गरिसकिएको र ती सामग्री आउने क्रममा रहेको जानकारी गराएका थिए। आवश्यक अन्य योजनासमेत सरकारले अघि बढाएको उनीहरूले बताएका थिए।