भोटेकोशी  बाढीका घाइते भेट्दै आङ्देम्बेले भने– उपचारमा कुनै कमी नहोस्

काठमाडौं । प्रमुख प्रतिपक्षी दल नेपाली कांग्रेस संसदीय दलका नेता भीष्मराज आङ्देम्बेले भोटेकोशी नदीमा आएको भीषण बाढीबाट घाइते भई उपचाररत नागरिकको स्वास्थ्य अवस्थाबारे जानकारी लिएका छन् ।

Watch On

आङ्देम्बेले बुधबार राति त्रिवि शिक्षण अस्पताल महाराजगञ्ज र ट्रमा सेन्टर पुगेर बाढीमा परी घाइते भएकाहरूलाई भेटेका हुन् । उनले उपचाररत घाइतेसँग भेट गरी उनीहरूको स्वास्थ्य अवस्था, उपचारको स्थिति र अस्पतालले उपलब्ध गराइरहेको सेवाबारे जानकारी लिएका थिए ।

घाइतेहरूको अवस्था बुझ्दै आङ्देम्बेले विपद्को समयमा उपचारमा कुनै कमी हुन नदिन सरकारको ध्यानाकर्षण गराए । बाढीबाट घाइते भएका नागरिकको जीवनरक्षा र उपचार सरकारको पहिलो प्राथमिकतामा हुनुपर्नेमा उनले जोड दिए ।

उनले घाइतेहरूको उपचारमा आवश्यक पर्ने औषधि, स्वास्थ्य सेवा तथा अन्य व्यवस्थापनमा कुनै समस्या भए तत्काल समाधान गर्न सरकारसँग आग्रह गरे । विपद्का कारण घाइते भएका नागरिकलाई राज्यले अभिभावकीय भूमिका निर्वाह गर्दै आवश्यक सबै सहयोग उपलब्ध गराउनुपर्ने उनको भनाइ थियो ।

आङ्देम्बेले घाइतेहरूको शीघ्र स्वास्थ्य लाभको कामनासमेत गरे । उनले बाढीका कारण भएको जनधनको क्षतिप्रति दुःख व्यक्त गर्दै विपद्को यस कठिन घडीमा पीडित नागरिकको साथमा नेपाली कांग्रेस रहेको बताए ।

‘विपद्को यो समयमा घाइतेहरूको उपचारमा कुनै कमी हुनु हुँदैन । राज्यले आफ्नो सम्पूर्ण संयन्त्र परिचालन गरेर नागरिकको जीवनरक्षा र उपचारलाई पहिलो प्राथमिकतामा राख्नुपर्छ,’ उनले भने ।

आङ्देम्बेले उद्धार, राहत र उपचारका लागि सरकारलाई आवश्यक सहयोग गर्न नेपाली कांग्रेस तयार रहेको पनि बताए । विपद्को सामना गर्न राजनीतिक दल, सरकार, सुरक्षा निकाय र नागरिक समाजबीच प्रभावकारी समन्वय आवश्यक रहेको उनको भनाइ थियो ।