जेनजी आन्दोलनमा ज्यान गुमाएका परिवारका लागि भदौ २३ अझै सकिएको छैन– एमाले

काठमाडौँ । नेकपा (एमाले) ले जेनजी आन्दोलनका क्रममा ज्यान गुमाएका युवाका परिवारका लागि एक वर्ष बितिसक्दा पनि भदौ २३ नसकिएको बताएको छ।

Watch On

एमालेले जारी गरेको वक्तव्यमा आफ्ना सन्तान गुमाएका परिवारका लागि त्यस दिनको पीडा अझै ताजा रहेको उल्लेख गरिएको छ। आन्दोलनका क्रममा ज्यान गुमाएका युवाको क्षतिको पूर्ति कुनै पनि शब्दबाट गर्न नसकिने एमालेले जनाएको छ।

'त्यतिबेला सरकारको नेतृत्वमा हाम्रो पार्टी थियो। यो सत्य हो र हामी यस सत्यबाट पन्छिँदैनौँ,' एमालेले भनेको छ।

नागरिकको अमूल्य जीवन गुम्ने गरी भएको घटनाप्रति आफूहरू सधैँ गम्भीर र दुःखी रहेको एमालेले जनाएको छ।

त्यस दिनको शान्तिपूर्ण प्रदर्शनमा कसले, किन र कसरी घुसपैठ गर्‍यो तथा कस–कसको कहाँ–कहाँ कमजोरी रह्यो भन्ने सत्य–तथ्य बाहिर आउने एमालेको भनाइ छ ।

'दोषी जोसुकै भए पनि कानुनबमोजिम सजाय पाउनुपर्छ र पीडित न्यायबाट वञ्चित हुनु हुँदैन,' एमालेले भनेको छ।

एमालेले आजको दिनलाई गम्भीर घटनालाई सम्झने, पीडितका कुरा सुन्ने, उनीहरूलाई स्मरण गर्ने र भविष्यमा यस्तो पीडा फेरि कहिल्यै दोहोरिन नदिने दृढ सङ्कल्प गर्ने दिनका रूपमा लिनुपर्ने जनाएको छ।

'मानिसको जीवनभन्दा ठूलो अरू केही हुन सक्दैन,' एमालेले भनेको छ।

आन्दोलनका क्रममा ज्यान गुमाउने सम्पूर्णप्रति भावपूर्ण श्रद्धाञ्जली अर्पण गर्दै एमालेले शोकसन्तप्त परिवारजनमा गहिरो समवेदना र घाइतेप्रति सम्मान व्यक्त गरेको छ।