हवाई माध्यमबाट ४ हजार ४० जनाको उद्धार

काठमाडौँ । नेपाली सेनाले भोटेकोशी बाढी प्रभावित विभिन्न क्षेत्रबाट आज दिउँसो ३ बजेसम्म हवाई साधनमार्फत थप २० जनाको उद्धार गरेको छ। हालसम्म हवाई साधनबाट ४ हजार ४० जनाको उद्धार गरिएको छ। उद्धार गरिएकामध्ये ३ हजार ७५७ जना नेपाली र २८३ जना विदेशी नागरिक छन्।

Watch On

रसुवागढी जलविद्युत आयोजनामा कम्पोजिट क्विक रेस्पोन्स टिम तथा आयोजनाका प्रतिनिधिसहितको टोली पावर हाउस र कन्ट्रोल प्वाइन्टसम्म पुगेर खोजी कार्य गरिरहेको छ।

रसुवा भोटेकोशी जलविद्युत आयोजनाको रोङ्गास्थित केबल टनेलमा संयुक्त टोलीले ड्रोनमार्फत खोजी गर्दा एक शव फेला पारेको छ।

लाङटाङ जलविद्युत आयोजनामा पनि संयुक्त उद्धार टोलीले खोज तथा उद्धार कार्य जारी राखेको छ।

चिलिमे हाइड्रोमा विदेशी प्राविधिकसहितको संयुक्त टोलीले ६/६ मिटर लम्बाइका चार वटा ठूला पाइप प्रयोग गरी हिँड्न मिल्ने बाटो तयार पारेको छ। स्याफ्रुवेशीदेखि चिलिमे जलविद्युत आयोजनाको टनेलसम्म हेभी इक्विपमेन्ट लैजान सडकमा रहेको ठूलो ढुंगा ब्लास्टिङ गरी हटाइएको छ। मेजर रकसम्म पुग्न अझै ९५ मिटर बाँकी रहेको छ।

विन्च मेसिन र बकेटको प्रयोग गरी टनेलभित्रको डेब्रिज हटाउने काम भइरहेको छ। संयुक्त टोली टनेलभित्र ११५ मिटरसम्म प्रवेश गरी खोजी कार्य गरिरहेको छ।

माथिल्लो त्रिशूली–१ मा विदेशी प्राविधिकसहितको संयुक्त टोली मुख्य प्रवेश टनेलमा करिब ४०० मिटरसम्म प्रवेश गरी खोजतलास गरिरहेको छ।

त्रिशूली–३ ए को पावरहाउस तथा टनेलमा नेपाली सेनाका ३४ जना, सशस्त्र प्रहरी बलका चार जना र आयोजनाका प्रतिनिधिसहितको संयुक्त टोलीले खोजी कार्य गरिरहेको छ।

त्रिशूली–३ बी मा नेपाली सेनाका १०१ जना र आयोजनाका प्रतिनिधिसहितको टोलीले खोज तथा उद्धार कार्य जारी राखेको छ