चिलिमे सुरुङको अपडेट : देखियो जीवनको संकेत, आवाज पठाउँदा इको सुनियो, भित्रबाट चिसो हावा आयो

काठमाडौँ । पूर्वमन्त्री कुलमान घिसिङले भोटेकोशी बाढीबाट प्रभावित रसुवास्थित चिलिमे जलविद्युत् केन्द्रको सुरुङमार्गको १२० मिटरभित्र आवाज पठाउँदा इको आएको बताएका छन् । 

Watch On

चिलिमेमा जलविद्युत् आयोजना सञ्चालनको लामो प्राविधिक अनुभवका आधारमा उद्धार टोलीलाई आवश्यक प्राविधिक सुझाव, समन्वय र सहजीकरण गरिरहेका घिसिङले उद्धारका क्रममा उद्धारका क्रममा सुरुङभित्र फसेका कर्मचारीहरू सकुशल रहेको बलियो आशा र सङ्केतहरू भेटिएको उल्लेख गरेका छन् । 

सुरुङको साँघुरिएको भागबाट करिब १२० मिटर भित्र आवाज पठाउँदा त्यसको प्रतिध्वनि (इको) सुनिएको र भित्रबाट चिसो हावा समेत आइरहेकाले फसेका व्यक्तिहरू सुरक्षित रहेको अनुमान गरिएको घिसिङले जानकारी दिएका छन् ।

उनकाअनुसार हाल विद्युत्गृह जाने मुख्य पहुँच सुरुङमा थुप्रिएको ठूलो मात्राको लेदो, बालुवा र ढुङ्गा हटाउने कार्य तीव्र गतिमा अघि बढिरहेको छ । उद्धार टोली लेदोको भाग छिचोल्दै अगाडि बढेको र अब विद्युत्गृहसम्म पुग्न करिब १०० मिटर मात्र बाँकी छ ।

यसैबीच, स्याफ्रुबेँसीतर्फबाट सुरुङसम्म बाटो बनाउन भारी उपकरणहरू परिचालन गरिएको छ । आज बेलुकासम्ममा सुरुङसम्म एक्स्काभेटर र लोडर पुग्ने र त्यसपछि उद्धार कार्यले थप तीव्रता पाउने उनको भनाइ छ । 

घिसिङले फसेकाहरुको उद्धार अभियान चलिरहेको भन्दै सुरुङभित्र रहेका सबै व्यक्तिहरूलाई छिट्टै सकुशल बाहिर ल्याउन सकिने आशा व्यक्त गरेका छन् ।