इलेक्ट्रोनिक खरिद प्रणाली बन्द गरेको भन्दै सरकारको विरोध

काठमाडौँ । नेपाल कम्युनिस्ट पार्टी (नेकपा) का सांसद युवराज दुलालले सरकारले इलेक्ट्रोनिक गभर्मेन्ट प्रोक्योरमेन्ट (ई–जीपी) प्रणाली बन्द गरेको भन्दै विरोध जनाउनुभएको छ ।

Watch On

शुक्रबार प्रतिनिधिसभाको बैठकमा सांसद दुलालले सार्वजनिक खरिद प्रक्रियालाई पारदर्शी, जवाफदेही र प्रतिस्पर्धी बनाउन विसं २०७० देखि लागू गरिएको ई–जीपी प्रणाली १३ वर्षपछि सरकारले बन्द गरेको भन्दै विरोध जनाए।

साउन, भदौ, असोज र कात्तिक महिना सरकारको मुख्य ठेक्कापट्टा लगाउने समय भए पनि प्रणाली बन्द हुँदा खरिद प्रक्रिया रोकिएको उनले बताए । उनका अनुसार प्रणाली बन्द हुँदा केन्द्र सरकारका सयौँ कार्यालय, ७५३ वटै स्थानीय तह र सातै प्रदेशअन्तर्गतका कार्यालयबाट हुने ठेक्कापट्टाको प्रक्रिया पूर्ण रूपमा प्रभावित भएको छ ।

यसबाट औषधि खरिद, स्वास्थ्य सामग्री, अत्यावश्यक वस्तुको आपूर्ति तथा समग्र विकास निर्माणका कामसमेत प्रभावित भएको उनले उल्लेख गरे।

सांसद दुलालले प्रणाली ह्याक भएको र पुरानो कोडबाट चल्न नसक्ने बहाना बनाएर ई–जीपी प्रणालीलाई नै ‘स्क्र्याप’ गरी नयाँ प्रणाली ल्याउने खेल भइरहेको सूचना आएको दाबी गरे।

विगतमा ह्याकिङमा संलग्न विचौलिया, कर्मचारी र व्यवसायीको मिलेमतोमा सरकारलाई प्रभावमा पारेर प्रणाली बन्द गराइएको हुनसक्ने उहाँले आशंका व्यक्त गरे ।

‘डिजिटल शासन र सुशासन’को नारा दिएर आएको सरकारले फेरि कागजी युगमा फर्किनु ठूलो विडम्बना हुने बताउँदै उहाँले कागजी प्रक्रियामा फर्काएर गुण्डागर्दी र लुटपाट शैलीमा ठेक्कापट्टा लगाउन खोजिए यसले मुलुकमा चरम कुशासन निम्त्याउने चेतावनी दिए।