१६ दिनदेखि राजमार्गसँग धादिङबेसीको सम्पर्कविच्छेद

धादिङ । रसुवाको भोटेकोशी हुँदै त्रिशूली नदीमा आएको बाढीले राष्ट्रिय राजमार्गसँग धादिङ सदरमुकाम धादिङबेसीको सडक सम्पर्क १६ दिनदेखि टुटेको छ । धादिङबेसी हुँदै जाने जिल्लाका उत्तरी भेगकमा गाउँबस्तीका स्थानीयलाई पनि आउजाउमा असहज भएको छ ।

Watch On

वैकल्पिक मार्ग प्रयोग गरेर आवतजावत चले पनि मुख्य ‘लाइफलाइन’ मानिने पुल बगाएपछि पृथ्वी राजमार्ग, व्यस्त मलेखु बजार र धादिङका अन्य बजार आवतजावत कठिन बनेको छ । पुल बगाए पनि छेउको सहिद गेट सुरक्षित छ । तर, नदी आसपासका घरटहरा भने कटानले जोखिममा छन् ।

२०५६ सालमा निर्माण गरिएको फुर्केखोला पुल १ सय १८ मिटर लम्बाइको 'स्टिल प्लेट गर्डर' पुल थियो । यस्ता पुल प्रायः धेरै भारवहान क्षमताको आवतजावत, लामो दूरीको खोँच वा नदीमा प्रयोग गरिन्छ । यति लामो दूरी पार गर्न मिल्ने खालको बेलीब्रिज नभएकाले अर्को विकल्प नहुँदासम्म वैकल्पिक सडक प्रयोग गर्नुपर्ने छ ।

साना तथा मालवाहक सवारी धादिङकै मासटार, गोरखा हुँदै आउजाउ गर्न मिल्ने विकल्प छ ।

कतिपय ठाउँमा हिलो र कच्ची रहेकाले वैकल्पिक सडकको यात्रा सहज भने छैन । पृथ्वी राजमार्गबाट मासटार–केउरेनी–पिपलटार–परेवाटार हुँदै धादिङबेसी पुग्ने वैकल्पिक मार्ग सञ्चालनमा छ ।

मालवाहक सवारीका लागि भने मुग्लिन–आँबुखैरेनी–गोरखा–आरुघाट–सल्यानटार हुँदै धादिङबेसी पुग्ने लामो मार्ग प्रयोग भइरहेको छ । यसैगरी, धादिङबेसीबाट काठमाडौँ आउजाउका लागि सुनौलाबजार–फोस्रेटार–कल्लेरीटार हुँदै गल्छी पुग्ने वैकल्पिक सडक पनि प्रयोग गर्न सकिने अवस्था छ ।