नेताका कुरा

सत्तामा रहिरहने भ्रमबाट मुक्त हुनुहोस्ः वर्षमान

सिधाकुरा

शुक्रबार, भदौ २६, २०८३

सत्तामा रहिरहने भ्रमबाट मुक्त हुनुहोस्ः वर्षमान

काठमाडौँ । नेपाली कम्युनिस्ट पार्टी(नेकपा)का सांसद वर्षमान पुनले सत्तामा रहिरहने भ्रमबाट मुक्त हुन सरकारलाई सुझाव दिएका छन् ।

Watch On

शुक्रबार प्रतिनिधिसभा बैठकमा बोल्दै सांसद पुनले लोकतन्त्रमा आवधिक निर्वाचनमार्फत सत्ता फेरबदल भइरहने बताए । ‘कार्यालयका भित्तामा झुण्डिएका पूर्वप्रधानमन्त्री र पूर्वमन्त्रीका तस्बिर हेरेर सधैँ सत्तामा रहिरहने भ्रमबाट मुक्त हुनुहोस्’ उनले भने ।

नेता पुनले सरकारलाई दम्भी, अहंकारी र धम्कीपूर्ण शैली त्यागी विनम्र हुन तथा सबैको अस्तित्व स्वीकार्न आग्रह समेत गरे । सांसद पुनले चुनावअघि ‘पैसा नहुनेले पढ्न पाउँछ’ भन्ने अभिव्यक्ति दिइएको तर सरकारमा गएपछि स्वास्थ्य, शिक्षा र घरेलु बिजुली खपतमा अतिरिक्त कर थोपरेर जनताको ढाड सेक्ने काम भएको आरोप लगाए ।

उनले जनेजी आन्दोलनको छानबिन गर्न गठित गौरीबहादुर कार्की नेतृत्वको जाँचबुझ आयोग र राष्ट्रिय मानव अधिकार आयोगले बुझाएका दुवै प्रतिवेदन तत्काल सार्वजनिक गरी सिफारिस कार्यान्वयन गर्न माग गरे ।

नेता पुनले रसुवा र नुवाकोटका दुर्गम तथा अति प्रभावित बस्तीहरूमा बाटो, पुल र सञ्चार सम्पर्क नहुँदा राहत पुग्न नसकेको बताउँदै राज्य केवल ’आकाश र काठमाडौँमा मात्र देखियो’ भन्ने जनआक्रोशप्रति ध्यान दिन आग्रह गरे ।

प्रकाशित मिति: शुक्रबार, भदौ २६, २०८३

प्रतिक्रिया दिनुहोस्