वीरगंज महानगरका डेढ दर्जन पूर्वकर्मचारीले ५ महिनादेखि पाएनन् उपदानको रकम

वीरगंज । वीरगंज महानगरपालिकाबाट अवकाशप्राप्त कर्मचारीले ५ महिनादेखि उपदानको रकम पाउन सकेका छैनन् । छैटाैँ, सातौँ तहका अधिकृत, महानगरका नाईके, कर्मचारीलगायत डेढ दर्जन अवकाश प्राप्त कर्मचारी विगत ५ महिनादेखि उपदानको रकम पाउन दाैडधुप गरिरहेका छन् तर पाउन सकेका छैनन् । 

Watch On

कर्मचारीहरुले पटक-पटक मौखिक तथा लिखित ताकेता गरेपनी उपदानबाट पाउने रकम नपाएर परिवारको भरण पोषण गर्न समस्या भइरहेको भन्दै रकम उपलब्ध गराईदिन निवेदन दिएका छन् ।

प्रमुख प्रशासकीय अधिकृत मात्रिका भट्टराई, वीरगंज महानगरका मेयर राजेशमान सिंह र उपमेयर इम्तयाज आलमलाई एक दर्जन बढी पूर्वकर्मचारीले दिएको निवेदनमा उपदान उपलब्ध गराईदिन ध्यानाकर्षण गराइएको छ । उनीहरुले उपदानबाट आउने रकम ब्याजसहित भुक्तानी गराईदिन माग गरेका छन् ।

अवकाश प्राप्त पूर्व कर्मचारी सातौँ तहका इन्जिनियर राजेश कुमार चौरासिया, छैटाैँ पदमा कार्यरत अधिकृत निरन्जन क्षेत्री, सुनिल सागर डंगोल, भरत बहादुर थपा, गोपाल प्रसाद मरहठ्ठा, मयानन्द देव, बबिता पौडेल, नाईके रामराज महतो लगायतले उपदानबाट आउने रकम ब्याजसहित भुक्तानी गराईदिन निवेदन दिएका छन् । 

पूर्व प्रशासकीय अधिकृत लक्ष्मी पौडल हुदैँ अवकाश प्राप्त कर्मचारी उपदानको रकम माग्दै आए पनि ५ महिना हुन लाग्दा नयाँ प्रशासकिय अधिकृत आएपछि पनि रकम उपलब्ध नगराएको पूर्वकर्मचारीहरुको आरोप छ ।