असोज ८ देखि १२ गतेसम्म देशभर भीषण वर्षाको सम्भावना, सतर्क रहन मौसमविद्को आग्रह

काठमाडौँ। नेपालमा अहिले वर्षा जारी रहे पनि यसले ठूलो क्षति भने  नपुर्‍याएको मौसमविद् विनोद पोखरेलले बताएका छन् । तर आगामी असोज ८ देखि १२ गतेसम्म पूर्वदेखि पश्चिमसम्म देशका धेरै स्थानमा भीषण वर्षाको सम्भावना देखिएकाले समयमै पूर्वतयारी र सतर्कता अपनाउन उनले आग्रह गरेका छन्।

Watch On

पोखरेलले सामाजिक सञ्जालमार्फत आगामी सेप्टेम्बर २४ देखि २८ सम्म नेपालका विभिन्न क्षेत्रमा भारी वर्षा हुनसक्ने पूर्वानुमान सार्वजनिक गरेका हुन् । पूर्वदेखि पश्चिमसम्मका धेरै स्थान प्रभावित हुनसक्ने देखिए पनि कुन क्षेत्रमा कति वर्षा हुन्छ भन्ने यकिन भइनसकेको उनले बताएका छन्।

उनका अनुसार यो तत्कालका लागि वर्षाको चेतावनी नभई सम्भावित अतिवृष्टिबारे पूर्वसूचना अर्थात् ‘एक्स्ट्रिम वेदर वाच’ हो।

सम्भावित वर्षालाई ध्यानमा राख्दै किसान, यात्रु तथा सर्वसाधारणलाई समयमै आवश्यक तयारी गर्न उनले आग्रह गरेका छन्। विशेषगरी किसानलाई अन्नबाली जोगाउन सम्भव तयारी गर्न उनले अनुरोध गरेका छन्।

‘अर्को हप्ता पूर्वदेखि पश्चिमसम्म धेरै स्थानमा भीषण वर्षाको सम्भावना देखिएकाले समयमै पूर्वतयारी र सतर्कता आवश्यक छ,’ पोखरेलले भनेका छन्, ‘यो सूचना किसानसम्म पुर्‍याऔँ, ताकि अन्नबाली जोगाउन सम्भव तयारी गर्न सकियोस्।’

उनले सम्भावित मौसमजन्य जोखिमबाट जोगिन सबैलाई सतर्क रहन आग्रह गरेका छन्।