नेभिगेशन
समाज

राजनीतिक मञ्चका रूपमा खुल्दै खुलामञ्च, कांग्रेसले गुञ्जाउने छ प्रतिपक्षी आवाज

काठमाडौं। काठमाडौंको केन्द्रमा रहेको खुलामन्च आन्दोलन, लोकतन्त्र र स्वतन्त्रताको प्रतीक मानिन्छ । यसपालि कांग्रेसले आफ्नो महाधिवेशन त्यही खुलामन्चमा गर्दैछ । पछिल्लो दश वर्षयता खुलामन्चमा हुन लागेको कांग्रेसको महाधिवेशन नै पहिलो राजनीतिक कार्यक्रम हुँदैछ । 

Watch On

Facebook Tiktok Youtube Instagram Twitter

चौधौं महाधिवेशन भृकुटीमण्डपमा गरेको कांग्रेसले यसपालि रणनीतिक रुपमा राजनीतिक सन्देश दिनकै लागि खुलामन्च छनोट गरेको हो । ऐतिहासिक र राजनीतिक महत्त्वको खुलामञ्च करिब एक दशकसम्म बन्द रह्यो । राजनीतिक सभा–सम्मेलनदेखि आन्दोलनको केन्द्र यही खुलामञ्च र रत्नपार्क हुने गर्थ्यो  । तर २०७३ वैशाखदेखि विभिन्न बहानामा खुलामञ्च बन्द रह्यो । त्यही बीचमा खुलामन्चलाई कहिले बसपार्क त कहिले व्यापार गर्ने ठाउँ पनि बनाइयो । राजनीतिक स्थललाई काठमाडौं महानगरले फुटबल मैदान बनाउन खोज्यो भनेर पनि विवाद भयो । बन्द भएको करिब एक दशकपछि खुलामञ्चलाई काठमाडौं महानगरपालिकाले २०८२ पुसमा सर्वसाधारणका लागि खुला गरेको थियो । खुलामञ्च केवल एक चौर मात्र नभई नेपालको लोकतान्त्रिक आन्दोलन र राजनीतिक परिवर्तनको साक्षी पनि हो ।  जनमत संग्रहको तयारीका क्रममा २०३६ सालमा बीपी कोइरालाले खुलामञ्चमा एक विशाल जनसभालाई सम्बोधन गरेका थिए । २०४६ सालको जनआन्दोलनको घोषणा यही खुलामन्चबाट गरिएको र जनआन्दोलनको सफलतापछि  गणेशमान सिंह, कृष्णप्रसाद भट्टराई र गिरिजाप्रसाद कोइराला लगायत नेताले यहीमन्चबाट सम्बोधन गरेका थिए । २०६२÷६३ को दोस्रो जनआन्दोलनको सफलतापछि यहीँ विशाल सभा गरिएको थियो । 

Marvel
Extreme Energy

विगतको तुलनामा खुलामन्चको स्वरुप फेरिएको छ । काठमाडौँ महानगरले यसको पुनर्निर्माण गरेको छ । महानगरका अनुसार खुलामञ्चको कुल क्षेत्रफल २३ हजार ४१५ वर्गमिटरमध्ये १४ हजार ६ सय वर्गमिटरमा प्राकृतिक नेपाली दुबो रोपिएको छ । अहिले यो चौर हरियो र आकर्षक देखिन्छ । खुलामन्चको वरिपरि ४ मिटर चौडाइको पैदल मार्ग– वाकिङ ट्रयाक बनाइएको छ । 

यही खुलामन्चमा कांग्रेस महाधिवेशनको उद्घाटन समारोह र बन्दसत्र हुने छ । जसका लागि धमाधम संरचना बनाइएको छ । १८ गते बिहानसम्म सबै संरचना तयार हुने कांग्रेसले जनाएको छ । 
कांग्रेस विभाजनको संघारमा छ । सँगै रुपान्तरण र पुस्तान्तरणको प्रक्रियामा छ । महाधिवेशनबाट कांग्रेसले नेतृत्व त छान्छ नै, त्यही महाधिवेशनबाट छानिने नेतृत्वले पार्टी एकतामा कस्तो भूमिका निर्वाह गर्छ अनि पार्टीको नीतिलाई कसरी पुनरपरिभाषित गर्छ भनेर सर्वत्र चासो उब्जिएको छ । 

प्रकाशित मिति:
प्रतिक्रिया दिनुहोस्
The Reporter
Current Affairs
Sidhakura Investigation
थप समाज