दाउन्ने बस दुर्घटनाः मामा–भान्जाको निधनले एलगाउँ शोकमग्न

राँझा (बाँके) । दसैँको पूर्वसन्ध्यामा दाउन्नेमा भएको बस दुर्घटनामा एकै गाउँका मामा–भान्जाको मृत्यु भएपछि बाँकेको खजुरा गाउँपालिका–२ एलगाउँ शोकमा डुबेको छ।

Watch On

नेपालगञ्जबाट काठमाडौं जाँदै गरेको प्रदेश–३–०१–००६ ख १५५३ नम्बरको बस शनिबार नवलपरासी (बर्दघाट सुस्तापूर्व)को विनयी त्रिवेणी गाउँपालिका–२ स्थित दाउन्नेको एसमोडमा दुर्घटना हुँदा चार जनाको मृत्यु भएको थियो।

दुर्घटनामा खजुरा गाउँपालिका–२ का ३६ वर्षीय बस चालक सुरेश बिसी, कोहलपुर नगरपालिका–३ का ३२ वर्षीय दीपेन्द्र केसी, कोहलपुर–१० का ५५ वर्षीय एकेन्द्रराज रेग्मी र नेपालगञ्ज उपमहानगरपालिका–७ का २२ वर्षीय कृष कनौजियाको मृत्यु भएको थियो।

मृतकमध्ये सुरेश र एकेन्द्र सहोदर मामा–भान्जा हुन्। एलगाउँका स्थायी बासिन्दा एकेन्द्र पछिल्लो समय कोहलपुरमा बस्दै आएका थिए।

स्थानीय भीम ओलीका अनुसार मामा र भान्जा दुवै बस चालक थिए। शनिबार भने भान्जा सुरेशलाई साथ दिन एकेन्द्र पनि बसमा सँगै गएका थिए।

“सोच्दै नसोचेको, कल्पनासमेत नगरेको यो दुःखद खबरले हामी स्तब्ध भएका छौँ,” ओलीले भने, “मामा एकेन्द्रराज रेग्मी र भाइ सुरेश बिसीको असामयिक निधनले पूरै परिवार र सिङ्गो गाउँ नै शोकमा डुबेको छ।”

मृतक मामा–भान्जाको स्थानीय मानखोला घाटमा दाहसंस्कार गरिएको छ।

खजुरा गाउँपालिकाका पूर्वअध्यक्ष किस्मतकुमार कक्षपतिले दसैँको मुखमा भएको दुर्घटनामा मानवीय क्षति भएपछि आफन्तसँगै समग्र जिल्लावासी पनि शोकमा रहेको बताए। उनका अनुसार २४ घण्टाको अन्तरालमा खजुरा गाउँपालिकाका दुई बस चालकले सडक दुर्घटनामा ज्यान गुमाएका छन्।

शुक्रबार काठमाडौंबाट बर्दियातर्फ आउँदै गरेको बस कपिलवस्तुमा दुर्घटना हुँदा खजुरा गाउँपालिका–५ का ३४ वर्षीय बस चालक सुमन खत्रीको घटनास्थलमै मृत्यु भएको थियो।

यता दाउन्ने दुर्घटनामा मृत्यु भएका कृष कनौजिया र दीपेन्द्र केसीका परिवार तथा आफन्त पनि शोकमा छन्।

कोहलपुर नगरपालिका–३ का वडाध्यक्ष माधव रिजालले दसैँको मुखमा वडाका युवा गुमाउनुपर्दा दुःख लागेको बताए। “दसैँको मुखमा वडावासी युवालाई गुमाउनुपर्दा निकै नरमाइलो महसुस भइरहेको छ,” उनले भने।