सरकार दल, संसद् र जनतासँग संवाद गर्न तयार छैन : शंकर पोखरेल

काठमाडौं । नेकपा एमालेका महासचिव शंकर पोखरेलले वर्तमान सरकार राजनीतिक दल, संसद् र जनतासँग संवाद गर्न तयार नरहेको आरोप लगाएका छन्।

Watch On

आइतबार काठमाडौंमा नेपाली कांग्रेसको १५औँ महाधिवेशन उद्घाटन समारोहलाई सम्बोधन गर्दै पोखरेलले राष्ट्रिय मुद्दामा दलहरूलाई एक ठाउँमा ल्याउन रास्वपा सभापति रवि लामिछानेले निरन्तर प्रयत्न गरे पनि सरकारले संवादको पहल नगरेको आरोप लगाए।

जनताबाट निर्वाचित प्रधानमन्त्रीले संसद् र संसदीय दलहरूलाई नचिन्नु तथा जनताका कुरा नसुन्नुले लोकतन्त्रको भविष्यमाथि नै प्रश्न उठाएको उनको भनाइ थियो।

पोखरेलले देश स्वेच्छाचारी शासन र अधिनायकवादतर्फ उन्मुख भइरहेको आभास भएको भन्दै लोकतन्त्रको रक्षाका लागि कांग्रेससहित सबै लोकतान्त्रिक र वामपन्थी शक्तिहरू फेरि एकपटक एकजुट हुनुपर्ने बताए।

राणाशासन, पञ्चायत र राजा ज्ञानेन्द्रको शासनविरुद्ध विगतमा राजनीतिक दलहरू संयुक्त रूपमा लडेको स्मरण गर्दै उनले अहिले पनि लोकतन्त्रको रक्षाका लागि सामूहिक नेतृत्व आवश्यक रहेको बताए।

इतिहासबाट पाठ सिक्न नसक्नेहरू सजायका भागीदार हुने भन्दै पोखरेलले युवाहरूका सपना र आशालाई निराशामा बदल्न नहुने बताए।

कांग्रेसको १५औँ महाधिवेशनले इतिहासको गौरवलाई भविष्यको योजनामा रूपान्तरण गर्दै नयाँ पुस्ताका भावना र चाहनालाई सम्बोधन गर्ने विश्वास व्यक्त गर्दै उनले महाधिवेशन सफलताको शुभकामना दिए।