कांग्रेस केन्द्रीय कार्यसमिति बैठक बस्दै, बन्दसत्रमा गगनको राजनीतिक प्रतिवेदन पेश हुने

काठमाडौं । नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति बैठक सोमबार बिहान १० बजे महाधिवेशनस्थल खुलामञ्चमा बस्ने भएको छ।

Watch On

केन्द्रीय कार्यसमिति बैठकपछि बन्दसत्र सुरु हुनेछ। बन्दसत्रमा सभापति गगनकुमार थापाले राजनीतिक प्रतिवेदन प्रस्तुत गर्ने कार्यक्रम छ। त्यस्तै, महामन्त्रीले विधान संशोधनसम्बन्धी प्रस्ताव पेश गर्नेछन्।

थापाले राजनीतिक प्रतिवेदनमार्फत कांग्रेसको आगामी राजनीतिक दिशा र आगामी दशकको राष्ट्रिय कार्यदिशाको खाका प्रस्तुत गर्ने तयारी गरेका छन्। प्रतिवेदनको मूल अवधारणाका रूपमा उनले ‘राष्ट्रिय पुनर्जागरण र समुन्नतिको आगामी दशक’ अघि सारेका छन्।

प्रतिवेदनमा कांग्रेसको ऐतिहासिक यात्रा, राजनीतिक उपलब्धि र अझै पूरा हुन बाँकी दायित्वको समीक्षा गर्दै बदलिँदो राष्ट्रिय परिवेशअनुकूल पार्टीको वैचारिक, राजनीतिक र संगठनात्मक रूपान्तरण आवश्यक रहेको उल्लेख गरिएको छ।

थापाले कांग्रेसमा देखिएको सत्ता–केन्द्रित राजनीति, संगठनात्मक कमजोरी र युवा पुस्तासँग बढेको दूरीलाई समेत आत्मसमीक्षाको विषय बनाएका छन्। पछिल्ला निर्वाचनमा कांग्रेसले व्यहोरेको पराजय र पछिल्ला दुई दशकको राजनीतिक अभ्यासको समीक्षा गर्दै परिवर्तनका उपलब्धि र जनताका अपेक्षाबीचको अन्तर पहिचान गर्नुपर्नेमा प्रतिवेदनले जोड दिएको छ।

भदौ २३ र २४ गतेको जनउभारदेखि १५औँ महाधिवेशनसम्म विकसित राजनीतिक घटनाक्रम, बदलिँदो सामाजिक मनोविज्ञान, पुस्ताबीचको दूरी, अर्थतन्त्र, बसाइँसराइ र विश्वमा भइरहेको तीव्र परिवर्तनलाई पनि प्रतिवेदनमा विश्लेषण गरिएको छ।

लोकतन्त्रप्रतिको आलोचना लोकतन्त्रकै अस्वीकारसम्म पुग्न सक्ने जोखिम र लोकरिझ्याइँले जनताको वास्तविक असन्तुष्टिलाई गलत राजनीतिक निष्कर्षतर्फ लैजान सक्ने अवस्थाप्रति समेत प्रतिवेदनले सचेत गराएको छ। यस्तो अवस्थामा कांग्रेसले लोकतन्त्रको पक्षमा आफ्नो ऐतिहासिक तथा समकालीन दायित्व स्पष्ट रूपमा निर्वाह गर्नुपर्ने थापाको दृष्टिकोण छ।

जिम्मेवार प्रतिपक्षदेखि राष्ट्रिय शक्तिसम्म

प्रतिवेदनमा कांग्रेसलाई निर्वाचनका बेला मात्रै सक्रिय हुने दलका रूपमा नभई निर्वाचनबीच पनि समाजमा निरन्तर उपस्थित रहने राष्ट्रिय शक्तिका रूपमा विकास गर्नुपर्ने प्रस्ताव गरिएको छ।

जिम्मेवार र स्पष्ट प्रतिपक्षको भूमिका निर्वाह गर्दै नागरिकका गुनासा सुन्ने, तथ्य र प्रमाणका आधारमा निष्कर्ष निकाल्ने तथा समाधान प्रस्तुत गर्ने राजनीतिक पद्धति विकास गर्नुपर्नेमा जोड दिइएको छ।

सामाजिक आन्दोलन, पार्टी संगठन र लोकतान्त्रिक मध्यस्थताबीचको सम्बन्ध, सार्वजनिक संवाद तथा नयाँ पुस्ताको राजनीतिक नेतृत्व निर्माणलाई पनि कांग्रेसको आगामी कार्यभारका रूपमा अघि सारिएको छ।

राष्ट्रियता, लोकतन्त्र र लोकतान्त्रिक समाजवादको पुनर्व्याख्या

थापाले कांग्रेसको वैचारिक आधारलाई २१औँ शताब्दीको बदलिँदो परिवेशअनुकूल पुनर्व्याख्या गर्ने प्रयास गरेका छन्। राष्ट्रियता, लोकतन्त्र र लोकतान्त्रिक समाजवादलाई कांग्रेसका स्थायी राजनीतिक आदर्शका रूपमा राख्दै तिनलाई ‘समुन्नत नेपाल’ निर्माणको लक्ष्यसँग जोडिएको छ।

प्रतिवेदनमा राष्ट्रियतालाई राष्ट्रको स्वाधीनता र जनताको सामूहिक स्वशासनसँग, लोकतन्त्रलाई सार्वजनिक शक्तिमाथि नागरिकको स्वामित्वसँग तथा लोकतान्त्रिक समाजवादलाई राजनीतिक स्वतन्त्रतासँगै सामाजिक–आर्थिक स्वतन्त्रतासँग जोडेर व्याख्या गरिएको छ।

‘समुन्नत नेपाल’ र ‘कस्तो कांग्रेस?’ को खाका

प्रतिवेदनमा ‘समुन्नत नेपाल’लाई आर्थिक वृद्धिमा मात्रै सीमित नगरी नागरिकको सामर्थ्य, अवसर, सहनिर्माण र जवाफदेहितासँग जोडिएको छ। राज्य, नागरिक र संस्थाबीचको सम्बन्धलाई नयाँ ढंगले परिभाषित गर्दै समुन्नतिलाई साझा जिम्मेवारीका रूपमा अघि बढाउने अवधारणा प्रस्तुत गरिएको छ।

आगामी कांग्रेस ‘विचारमा स्पष्ट, संगठनमा जीवन्त र जनताप्रति जवाफदेही’ हुनुपर्ने प्रतिवेदनको निष्कर्ष छ।

सदस्यता, नागरिक सहभागिता र पार्टीभित्र स्वामित्वको भावना बढाउने, आन्तरिक लोकतन्त्र बलियो बनाउने, अर्थपूर्ण समावेशिता कायम गर्ने तथा नयाँ पुस्तासहित विभिन्न पुस्ताबीचको सहकार्य बढाउने प्रस्ताव पनि प्रतिवेदनमा समेटिएका छन्।

त्यस्तै, जनप्रतिनिधिका लागि उच्च नैतिक मापदण्ड र स्पष्ट कार्यप्रतिबद्धता, पार्टीको स्वच्छ वित्तीय आधार तथा सार्वजनिक लेखापरीक्षणलाई संगठनात्मक सुधारका महत्वपूर्ण पक्षका रूपमा अघि सारिएको छ।

१५औँ महाधिवेशनको बन्दसत्रमा प्रस्तुत हुने राजनीतिक प्रतिवेदनले कांग्रेसको विगतको आत्मसमीक्षादेखि आगामी दशकको राष्ट्रिय पुनर्जागरण, समुन्नत नेपाल निर्माण तथा पार्टीको वैचारिक र संगठनात्मक रूपान्तरणसम्मको समग्र खाका अघि सार्ने तयारी गरेको छ। विधान संशोधनसम्बन्धी महामन्त्रीको प्रस्तावमाथि पनि बन्दसत्रमा छलफल हुनेछ।