पोर्चुगलका मुख्य प्रशिक्षकले बेइमानी गरेपछि रोनाल्डोले मुख खोले, जुनसुकै कारबाही भोग्न तयार

काठमाडौँ । पोर्चुगल राष्ट्रिय फुटबल टोलीका कप्तान क्रिस्टियानो रोनाल्डोले हालै टोलीको प्रशिक्षण क्याम्प छाड्नुको पछाडिका घटनाक्रमबारे सत्य तथ्य सार्वजनिक गर्दै १० पृष्ठ लामो आधिकारिक वक्तव्य जारी गरेका छन् । 

Watch On

सन् २०२६ को विश्वकपपछि नै अन्तर्राष्ट्रिय फुटबलबाट संन्यास लिने तयारी गरे पनि पोर्चुगिज फुटबल महासंघ (एफपीएफ) का अध्यक्ष र मुख्य प्रशिक्षकको आग्रहमा उनी टोलीमै रहने निर्णयमा पुगेका थिए। तर, मुख्य प्रशिक्षकले लगातार आफ्नो बाचा तोडेपछि र विश्वासको वातावरण समाप्त भएपछि आफूले क्याम्प छाड्ने कठिन निर्णय लिएको रोनाल्डोले स्पष्ट पारेका छन्।

२०२६ विश्वकपपछिको पृष्ठभूमि र प्रशिक्षकसँगको सम्झौता 

रोनाल्डोका अनुसार सन् २०२६ को विश्वकप समापनपछि उनी राष्ट्रिय टोलीबाट बिदा हुने मनस्थितिमा थिए र उनले पोर्चुगाली जनताका नाममा बिदाई पत्रसमेत तयार पारिसकेका थिए । तर अमेरिकाबाट फर्किने क्रममा एफपीएफका अध्यक्षले उनलाई निर्णयमा पुनर्विचार गर्न आग्रह गरेपछि र नयाँ मुख्य प्रशिक्षकको नियुक्तिमा समेत रोनाल्डोको सकारात्मक सहमति रहेपछि उनी टोलीमा निरन्तर रहन सहमत भएका थिए ।

सिजनको सुरुवातमा मुख्य प्रशिक्षकसँग भएको छलफलमा रोनाल्डोको शारीरिक सुगठन र फिटनेसलाई ध्यानमा राख्दै पहिलो र अन्तिम खेल खेलाउने योजना तय भएको थियो । प्रशिक्षकले रोनाल्डोलाई नर्वे र डेनमार्क भ्रमणमा नदिई पोर्चुगलमै विश्राम गर्न प्रस्ताव गरे पनि, टोलीको कप्तान भएकाले टोलीसँगै नजानु गलत सन्देश हुने भन्दै रोनाल्डोले उक्त प्रस्ताव अस्वीकार गरी भ्रमणमा सहभागी भएका थिए ।   

नर्वे विरुद्धको खेलको दिन खाजा खाने समयमा प्रशिक्षकले रोनाल्डोलाई ३० मिनेट खेलाउने प्रस्ताव राखेका थिए । यो पूर्वयोजनाभन्दा बाहिरको विषय भए तापनि रोनाल्डोले त्यसलाई स्वीकार गर्दै हाफटाइमदेखि नै मैदान बाहिर वार्म-अप सुरु गरेका थिए। तर, खेल अवधिभर उनलाई मैदानमा प्रवेश गराइएन ।

प्रशिक्षकले आफ्नो बाचा पूरा नगरेपछि निराश बनेका रोनाल्डो खेलपछि समर्थकहरूलाई अभिवादन नगरी मैदानबाट बाहिरिएका थिए । वक्तव्यमा उनले आफ्ना समर्थकहरू र पोर्चुगाली जनतासँग उक्त व्यवहारका लागि माफी माग्दै त्यो क्षणिक निराशाको परिणाम भएको स्वीकार गरेका छन् ।   

८ बुँदे सहमति र प्रशिक्षकको मिडिया प्रस्तुति 

नर्वे विरुद्धको खेलको ४८ घण्टापछि रोनाल्डो, मुख्य प्रशिक्षक र अल नास्रका स्पोर्ट्स डाइरेक्टर सिमाओ कोउटिन्होबीच भएको वार्तामा विषयलाई शान्त पार्न एउटा सहमति भएको थियो । प्रशिक्षकले पत्रकार सम्मेलनमा आफ्नो गल्ती स्वीकार गर्दै ८ बुँदे स्पष्टीकरण दिने बाचा गरेका थिए ।

उक्त ८ बुँदे सहमतिमा प्रशिक्षक स्वयंले रोनाल्डोसँग छलफल गरी सिजनको योजना बनाएको,  २४ वर्षदेखि टोलीमा रोनाल्डोको योगदान र प्रभावको कदर गरिएको, रोनाल्डोले योजना स्वीकार गरेको र कहिल्यै प्राविधिक निर्णयमा हस्तक्षेप नगरेको, नर्वे खेलमा खेलाउने विषय योजना बाहिरको भए पनि रोनाल्डो तयार भएको, पेले वा म्याराडोना कदको खेलाडीलाई वार्म-अप गराएर मैदानमा नछिराउनु प्रशिक्षकको गल्ती रहेको, राष्ट्रिय टोलीलाई रोनाल्डोको अझै आवश्यकता रहेको र फ्यानहरूप्रतिको मायामा कुनै कमी नरहेको जस्ता कुराहरू समेटिएका थिए ।

तथापि, सहमति अनुसार पत्रकार सम्मेलनमा सत्य तथ्य प्रस्तुत गर्नुको साटो मुख्य प्रशिक्षकले रोनाल्डोप्रति आक्रामक र आफू उच्च तथा शक्तिशालीजस्तो व्यवहार देखाएपछि रोनाल्डोले यसलाई दोस्रो पटकको बाचाभंगका रूपमा लिएका हुन् ।

पटक-पटक बाचा तोडिएपछि विश्वासको वातावरण समाप्त भएको महसुस गर्दै रोनाल्डोले क्याम्प छाड्ने निर्णय लिएका थिए । यो निर्णयको सम्पूर्ण जिम्मेवारी आफैंले लिँदै उनले आफ्ना सहकर्मी खेलाडीहरूसँग र पोर्चुगाली जनतासँग माफी मागेका छन् ।

टोलीको कप्तान भएकाले आफ्नो जिम्मेवारी अझ बढी हुने र पोर्चुगिज फुटबल महासंघले गर्ने जुनसुकै कडा अनुशासनको कारबाही वा निलम्बन भोग्न आफू तयार रहेको उनले बताएका छन् ।

'निलम्बनपछि पुनः पोर्चुगलका लागि खेल्नेछु' 

वक्तव्यको अन्त्यमा रोनाल्डोले आफू राष्ट्रिय टोलीबाट संन्यास लिने पक्षमा नरहेको प्रस्ट पारेका छन् ।

एफपीएफले तोक्ने निलम्बनको सजाय पूरा गरेपछि र क्लब फुटबलमा आफ्नो लय कायम राख्दै शारीरिक रूपमा फिट भएपछि पुनः राष्ट्रिय टोलीका लागि प्रतिस्पर्धा गर्न र जित दिलाउन आफू सधैं उपलब्ध रहने उनले घोषणा गरेका छन् ।

उनले आफ्नो बुबाको निधनको खबर पाउँदा समेत राष्ट्रिय टोलीको क्याम्प नछाडेको स्मरण गराउँदै देशप्रतिको समर्पण र सत्यता नै आफ्नो प्राथमिकता रहेको बताएका छन् ।