भारतमाथि किन खनिए एलन मस्क ?

न्युयोर्क । अमेरिकी अर्बपति एलन मस्कले केही भारतीय उद्योगपतिहरूले भारतमा स्टारलिङ्कको प्रवेश रोक्न खोजेको आरोप लगाएका छन् ।

Watch On

मस्कले उनीहरूको व्यापारिक 'एकाधिकार' (मोनोपोली) कायम राख्नका लागि यस्तो गरिएको र यो भारतीय जनताविरुद्धको अपराध भएको दाबी गरेका हुन् ।

सामाजिक सञ्जाल 'एक्स'मा एक प्रयोगकर्ताको पोस्टको जवाफ दिँदै मस्कले लेखेका छन्, "दुर्भाग्यवश, भारतीय जनतामाथि उनीहरूको 'एकाधिकारवादी' पकड कायम रहोस् भनेर केही उद्योगपतिहरूले हामीलाई रोकिरहेका छन्। उनीहरू को हुन् भनेर तपाईंहरू अनुमान लगाउन सक्नुहुन्छ... यो भारतका जनताविरुद्धको अपराध हो!"

उक्त पोस्टमा भारतका धेरै गाउँहरू अझै पनि ब्रोडब्यान्ड इन्टरनेटसँग जोडिन नसकेकाले देशमा स्टारलिङ्कको आवश्यकता रहेको उल्लेख गरिएको थियो।

मस्कले थप लेखेका छन्, "भारतमा स्टारलिङ्कले हालको महँगो शुल्कका कारण इन्टरनेट प्रयोग गर्न नसकिरहेका वा इन्टरनेटको पहुँच नै नपुगेका मानिसहरूलाई तीव्र गति र किफायती इन्टरनेट सेवा उपलब्ध गराउन सक्नेछ।"

यसैबीच, नयाँ दिल्लीमा आयोजित 'इन्डिया मोबाइल कंग्रेस' मा स्टारलिङ्ककी बिजनेस अपरेसन उपाध्यक्ष लरेन ड्रेयरले कम्पनीले भारतमा २० वटा 'गेटवे साइट' निर्माण गरिसकेको जानकारी दिएकी छन्। साथै, भारतीय प्रयोगकर्ताको डेटा देशभित्रै सुरक्षित राख्नका लागि भारतको मापदण्डअनुसार सुरक्षा नियन्त्रण प्रणालीसमेत विकास गरिएको उनले बताइन्।

ड्रेयरका अनुसार आवश्यक सबै सरकारी स्वीकृतिहरू प्राप्त हुनेबित्तिकै स्टारलिङ्कले भारतमा भूउपग्रह (स्याटेलाइट) ब्रोडब्यान्ड सेवा चाँडो भन्दा चाँडो सुरु गर्ने लक्ष्य राखेको छ।