नोबेल शान्ति पुरस्कारका लागि ट्रम्पको मरिहत्ते !

वाशिंटन डिसी । अमेरिकी राष्ट्रपति डोनाल्ड ट्रम्पले बुधबार आफूले नोबेल शान्ति पुरस्कार पाउनुपर्ने बताएका छन् ।

Watch On

पत्रकारहरूसँग कुरा गर्दै उनले भने, 'कुनै पनि राष्ट्रपतिले कहिल्यै कुनै युद्ध अन्त्य गराएका छैनन् । मैले आठ वटा युद्ध अन्त्य गराएको छु र सम्भवतः संसारलाई पूर्ण रूपमा विनाश हुनबाट पनि जोगाएको छु । त्यसैले मैले नोबेल शान्ति पुरस्कार पाउनुपर्छ ।'

सन् २०२६ को नोबेल शान्ति पुरस्कारको घोषणा नर्वेली नोबेल समितिले शुक्रबार गर्दैछ ।

पुरस्कारका बारेमा सोधिएको प्रश्नमा ट्रम्पले भने, 'उनीहरूको निर्णय के हुन्छ मलाई थाहा छैन। मजस्ता मानिसहरूलाई यो पुरस्कार नदिने उनीहरूको छवि रहँदै आएको छ ।'

सत्तामा पुनः आएदेखि नै ट्रम्पले आफू विश्वकै सर्वाधिक प्रतिष्ठित पुरस्कारहरूमध्ये एक नोबेल शान्ति पुरस्कारको हकदार भएको दाबी बारम्बार गर्दै आएका छन् ।

ओभल अफिसमा पत्रकारहरूसँग उनले थपे, 'अब सम्भवतः त्यो समय आएको छ । अघिल्लो पटक पुरस्कार पाउने व्यक्तिले नै इतिहासमा अरू कसैभन्दा पनि राष्ट्रपति ट्रम्प यसको बढी हकदार हुन् भनेका थिए । उनीमार्फत अप्रत्यक्ष रूपमा यो सम्मान पाउँदा मैले निकै सम्मानित महसुस गरेको थिएँ ।'

भेनेजुएलाकी विपक्षी नेत्री मारिया कोरिना मचाडोले गत जनवरीमा आफ्नो सन् २०२५ को नोबेल शान्ति पुरस्कार पदक ट्रम्पलाई दिएकी थिइन् ।