मधेसमा नयाँ सरकार गठन गर्न एमाले, जसपा र जनमतबीच छलफल

जनकपुरधाम । मधेस प्रदेशमा नयाँ सरकार गठनका लागि नेकपा (एमाले), जनता समाजवादी पार्टी (जसपा) नेपाल र जनमत पार्टीबीच छलफल अघि बढेको छ ।

Watch On

नेपाली कांग्रेस संसदीय दलका नेता कृष्णप्रसाद यादव नेतृत्वको सरकारलाई एमालेले गत असोज २५ गते दिएको समर्थन फिर्ता लिएपछि तीन दल नयाँ सरकार गठनको तयारीमा जुटेका हुन् ।

जनमत पार्टीका नेता तथा प्रदेशसभा सदस्य महेशप्रसाद यादवले तीन दलबीच नयाँ सरकार गठनका विषयमा छलफल भइरहेको बताए । तर, सरकारको नेतृत्व कसले गर्ने भन्ने विषयमा भने सहमति भइनसकेको उनको भनाइ छ ।

एमाले संसदीय दलका नेता सरोजकुमार यादवले पनि जसपा र जनमत पार्टीका नेताहरूसँग नयाँ सरकार गठनका विषयमा संवाद भइरहेको बताए । चाडपर्व सकिएपछि छलफललाई निष्कर्षमा पुर्‍याइने उनले जानकारी दिए ।

नयाँ राजनीतिक समीकरण बनेसँगै तीनवटै दलले सरकारको नेतृत्वमा दाबी गर्दै आएका छन् । प्रदेशसभाको सबैभन्दा ठूलो दल जसपाले सरकारको नेतृत्व आफूले पाउनुपर्ने अडान राख्दै आएको छ ।

जसपा संसदीय दलका नेता सरोजकुमार यादवले तीनवटै दलका अध्यक्षबीच केन्द्रबाटै प्रदेश सरकारको नेतृत्वका विषयमा सहमति जुटाउने समझदारी भएको बताए ।

एक सय सात सदस्यीय मधेस प्रदेशसभामा सरकार गठनका लागि कम्तीमा ५४ सदस्यको समर्थन आवश्यक पर्छ । प्रदेशसभामा अहिले कांग्रेसका २२, एमालेका २३, जसपाका २७, नेपाली कम्युनिष्ट पार्टीका १५ र जनमत पार्टीका १२ सदस्य छन् । त्यस्तै, सङ्घीय समाजवादी पार्टी र राष्ट्रिय प्रजातन्त्र पार्टीका एक–एक सदस्य छन् ।