पूर्वाधार

यस्तो देखियो राम्दीको नयाँ पुल

सिधाकुरा

आइतबार, कात्तिक १५, २०८३

स्याङ्जा । सिद्धार्थ राजमार्गअन्तर्गत स्याङ्जा र पाल्पा जिल्ला जोड्ने कालीगण्डकी नदीमाथि निर्माण गरिएको राम्दीको कङ्क्रिट फिल्ड स्टिल ट्युब आर्च ब्रिजको निर्माण पूरा भएको छ ।

Watch On

गण्डकी र लुम्बिनी प्रदेशलाई जोड्ने गरी स्याङ्जाको गल्याङ नगरपालिका–१ राम्दीमा निर्माण गरिएको उक्त पुल देशकै पहिलो नमुना ‘टाइड आर्च’ प्रविधिको हो । ‘कङ्क्रिट फिल्ड स्टिल ट्युब आर्च ब्रिज’ नामक यो पुल थाइल्यान्डका डिजाइनरले डिजाइन गरेका हुन् । चीन र दुबईमा यस प्रविधिका पुल निर्माण भए पनि नेपालमा भने यो पहिलो हो ।

पुल सेक्टर पोखराले गरेको भारवहन क्षमता परीक्षणका क्रममा पुल ३० मिलिमिटर मात्र लच्किएको पुल सेक्टरका प्रमुख कृष्णप्रसाद अधिकारीले जानकारी दिए । उनका अनुसार पुलको स्वीकृत विचलन सीमा १४६ मिलिमिटर रहेको र एकैपटक २४० टनसम्मको भार पर्दा पनि पुल सुरक्षित देखिएको छ ।

परीक्षणका क्रममा दुई, चार र छवटा ट्रक एकैपटक पुलमा राखेर भारको प्रभाव अध्ययन गरिएको थियो । तापक्रमले समेत पुलको भारवहन क्षमतामा प्रभाव पार्न सक्ने भए पनि परीक्षणको नतिजा र हालको अवस्थाका आधारमा पुल सुरक्षित रहेको अधिकारीले बताए ।

२७ करोड ७१ लाखको लागतमा निर्माण गरिएको पुलको ठेक्का सम्झौता २०७९ सालमा भएको थियो । तीन वर्षभित्र निर्माण सम्पन्न गर्ने गरी सम्झौता भएको उक्त पुल निर्माणसँगै राम्दीको पुरानो पुलमा बढी तौलका सवारीसाधन आवतजावत गर्दा हुँदै आएको असहजता हट्ने अपेक्षा गरिएको छ ।

प्रकाशित मिति: आइतबार, कात्तिक १५, २०८३

प्रतिक्रिया दिनुहोस्